今年10月，馬鞍山牛烏水塘因一位於山澗赤裸浸浴嘅大媽而瞬間爆紅，成為打卡熱點，被網民形容為「港版華清池」，唔少人都想一睹「楊貴妃」大媽風采，不過就未必個個「有眼福」，大多去到只見到波平如鏡嘅水池、清澈嘅水塘、環境平靜舒適嘅水壩，原本的確係兩個人拍拖閒遊之選。
牛烏水塘靠近利安邨以南小山，由馬鞍山出發，經錦安苑巴士總站，沿錦英路直行至小徑入口，路口對面為富寶花園，直入經過馬鞍山繞道橋底，會見到有小山路入口，沿路即可直上牛烏水塘同牛烏石澗。
途中全為山路，不過尚算安全，遍佈林蔭樹木遮蔭，只係需要留意路面小石，避免絆倒，幾分鐘後有分岔口，左邊直行一小段路，小水壩即映入眼簾，風光明媚，可從高點望馬鞍山市景。水壩唔算好宏偉，但不失為relax之地，而水壩背後更有一個三角形小石灘同小瀑布，既可沿小水壩邊而走，亦可從小石灘回望小水壩，從小瀑布頂亦可俯視小水壩，從小瀑布旁邊攀爬都唔算辛苦。
沿山路再向上行，會行到石澗處，當中有一個佛系水池，湖水尚淺，屬圓形水池，同水塘一樣清澈，有種遠離俗世感覺。如果由原本分岔口向右邊方向行，即石澗位置大概再向上行約30分鐘，可以到達被稱為「港版華清池」嘅「大媽水池」。
牛烏水塘為小型儲水池，靠近牛岬山山腰，原本為向烏溪沙兒童新村供水而興建，可自給自足，目測該水池大概有2至3米長、闊，水底可見，唔算太深，水深僅約1米至1.5米，兩旁有大石，屬方形人工水池，環境天然，的確係有去日本浸溫泉嘅感覺。從石級向上行，可到池頂，俯視整個人工水池。
據影片顯示，該大媽不單於水池內裸浴，甚至於溪澗做瑜珈、洗衫、攞水，更甚者留低垃圾、煙蒂，有指大媽為目前領取綜緩嘅新來港人士，居於利安邨，片段瘋傳後一度被山友大鬧污染環境。事實上，據第208A章《郊野公園及特別地區規例》顯示，任何人不得在郊野公園或特別地區內故意或疏忽地以任何方法阻塞或污染任何溪流、水道、水池或水潭；棄置任何廢物、紙張或廢料，但將其棄置在為此而提供的箱或容器內則除外；以相當可能引致失火的方式拋棄任何火柴、燃點的香煙、煙斗灰燼或其他物質，否則可被檢控，一經定罪，最高罰款2,000元及監禁3個月。
水塘似足被山林環抱嘅小天地，從水塘向右繼續行，可以直上吊手岩、牛岬山等山丘，地勢則比較險要，山路更多碎石，非平坦路段，絕對需量力而為。
E.A.Tips﹕
（1）巴士路線85M,86K,86S,87D,287D、小巴路線805S,808都可到達錦安苑巴士總站，從錦安苑巴士總站步行到小徑路口，穿過馬鞍山繞道橋底即可到達山路入口，有山友寫有「上山」字樣。
（2）路段全為山路，凹凸不平，唔算辛苦，但地勢險要，需要小心個人安全。
（3）唔好污染山水，重有自己垃圾自己帶走。
（4）路段雖唔算崎嶇難行，但石澗同路後多碎石，泥土鬆散，大雨時、大雨前後要謹記避免上山或石澗行走。
（5）可於錦英苑巴士總站附近便利店作補給點，然後先上山。
（6）若從新港城中心步行，穿過天橋後，經新港城中心大街3期，再穿過隧道，可到達錦英路，沿錦英路直上一段路，左邊係富寶花園，右邊係錦英苑、街市，雖行天橋到錦英苑方向，穿過巴士總站直行5分鐘即達小徑入口處。
牛烏水塘
馬鞍山利安邨以南山坡 
24hours
在〈一夜爆紅「港版華清池」 馬鞍山石澗穿插牛烏水塘〉中有 1 則留言
留言功能已關閉。