CHI Tachinomi

屯門市中心小確幸 日式居酒屋歎超水準牛肉飯



[sp_html5video category=”4042″]

去過中環碼頭嘅你,應該對呢間小店唔陌生,名為CHI Tachinomi嘅日式居酒屋本來似足日本屋台,於今年9月初宣佈喺屯門開設分店,位處屯門市廣場內,只有街景,缺乏海景,變成冷氣間,除咗大阪名物土手燒、清酒,更有飯類、小食選擇,都算係屯門市中心小確幸,可以拍拖去幻想返去日本旅行時嘅情境。

室內分為兩個空間,上層有一張長吧枱,正對開放式廚房,下層就係普通卡位、高枱櫈,大窗戶外係熙熙攘攘嘅屯門街道,可於鬧市中感受幾分寧靜。

據官方形容,最初由於林鄭禁堂食,傍晚6點只有外賣,難以賣牛扒,所以推出老闆喜愛嘅大阪牛肉飯,細碗$55,大碗$90,特別採用日式慢煮頂級牛肉配越光米。越光米製嘅牛肉飯,飯粒飽滿,帶黏性,有光澤,入口煙韌,略帶甜味,充滿飯香。大廚似乎對處理肉類有一手,牛肉黏滑,連有少少腩筋,唔嚡口,表面燒汁帶香甜味,牛脂唔太重,留有肉汁,一口飯後一口牛肉,細細碗都滿足。

至於細鰻魚飯 Unagi,細碗$68,大碗$95,價錢算中上,有濃稠嘅鰻魚汁,足夠撈飯,鰻魚好厚肉,質感軟嫩,焦脆感比較少,但賣相唔錯,兩個人去食一人一碗嘅話,女仔會夠食,男仔可能未必夠啦。

玉子燒 Tamago $28 就係其中一款小食,上枱夠熱力,軟綿綿,好有蛋香味,略帶少少甜,似日本街頭玉子燒。另有其他日式串燒,好有日本屋台風格。

延伸閱讀﹕飯麵款款芝味濃 屯門小店安格斯漢堡爆多芝士極邪惡

延伸閱讀﹕【逆線而行】屯門有四面佛? 藍地水塘翠綠版天空之鏡 夢幻彩虹欄杆打卡

E.A.Tips﹕

(1)網上資料不能盡信,Openrice地址都係錯嘅,寫住屯順街,可以睇到位置放喺屯門公路中間,大概set地圖嘅人都係亂咁點。正確應該係屯順街轉右入屯隆街,於屯隆街嘅屯門市廣場入口進入,外面側門比較似門口,但其實商場內先為正門。

(2)需要用QR Code落單,於正門進入,店員會將QR Code遞上,點完餐,店員會隨後送上食物、飲品,食完去返上層埋單就得,價錢無加一。

CHI Tachinomi

屯門屯順街1號屯門市廣場一期地下G073號舖
11:30 – 22:30
2331 3135

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!