【逆線而行】屯門有四面佛？藍地水塘翠綠版天空之鏡夢幻彩虹欄杆打卡

2021-01-25 2021-08-10 / 低級行山路線、假日好去處、夕陽靚景、屯門四面佛、屯門好去處、彩虹欄杆、拍拖好去處、文青打卡、日落景、日落點、藍地水塘 / 作者: 撰文﹕Miss A ；攝影﹕Mr E, Miss A；設計﹕Mr E

藍地水塘係其中一個熱門嘅香港水塘，呢條藍地水塘至屯門徑嘅行山徑都係人所共知，當中彩虹欄杆更加係打卡位，路段貫穿大半屯門區，的確係兩個人拍拖好去處。大多數人都會由屯門何福堂方向出發上屯門徑，先遊彩虹欄杆，再到藍地水塘，以南安佛堂、藍地大街作結；今次記者逆線而行，由嶺南大學、富泰村方向作起點，先遊藍地水塘，再上虎地郊遊徑、彩虹欄杆，最後返回屯門市中心，睇睇有咩分別？

今次路線由嶺南大學為起點，穿過嶺南大學學生宿舍、虎地村，經富泰村、農地、村屋、南安佛堂，路段平坦20至30mins可輕鬆直接行到藍地水塘。中途會見到村屋有一座屯門四面佛，不過看似並非開放予公眾，應該係私人請神佛返香港。

水塘位處屯門虎地，呈漏斗形，亦叫老虎坑水塘或藍地灌溉水塘，由幾條引水道滙集而成，水流由屯門河流入青山灣，原為農地灌溉用途，而附近亦有另一個洪水坑水塘，距離唔遠。

藍地水塘湖水碧綠，輕鬆望見天空之鏡，樹木排列整齊，反映於波平如鏡嘅湖面之上，一片翠綠，景觀一望無際，環境清靜而舒服。

由藍地水塘行到彩虹欄杆前，先會經過虎地燒烤場，其後路段持續上斜，繼續上樓梯後，直到行到分岔路指示牌，沿何福堂方向落山，直達若夢園，可作休息處。落山行到若夢園位置，左邊路口會見到一道彩虹欄杆，繼續沿髹上彩色欄杆嘅屯門徑行走，穿過樹蔭後可望見連綿不絕嘅七色欄杆，欄杆背後可清晰環瞰屯門市區全景，包括藍地、虎地。事實上，所謂彩虹欄杆，只係將普通單調嘅欄杆髹滿繽紛色彩，令少女們可拍攝夢幻彩虹效果，記者反而覺得除咗景觀，欄杆並無特別之處。

返回若夢園，可從左右邊方向落山，大概約15至25分鐘步程，就可從彩虹欄杆處直接返回市中心。左邊會經屯門徑1段、麥理浩徑10段，大概會去到中華基督教會何福堂書院方向，靠近屯門市中心；而右邊則經屯門徑1段，直達怡樂花園方向，路段大多平坦而行，稍有落斜位。

逆線而行嘅好處，係唔需要同其他人逼於同一個方向上山，減少上山接觸太多人群嘅機會，反而可以感受上山樂趣。

E.A.Tips﹕
（1）巴士路線巴士67X,67M,261,960S,K51、小巴路線46,42號，都可到達西鐵兆康站、嶺南大學附近，甚至直達富泰村。
（2）屯門四面佛靠近富泰村，位處屯門虎坑路，Google顯示開放時間為星期六日11:30–18:00，不過實際上係私人地方，不可亂闖。
（3）路段既有水泥路，亦有山路，大多平坦而行，但都要小心山路危險。
（4）謹記唔好污染水塘，自己垃圾自己帶走。

延伸閱讀﹕屯門市中心小確幸日式居酒屋歎超水準牛肉飯

延伸閱讀﹕【此黃不同彼黃】無料變有料案內所全新日式午市套餐最平$47

延伸閱讀﹕半島大廚製牛骨湯屯門台菜小店試業驚喜連連