疫症期間無得去旅行，唯有將啲錢轉為留喺香港食好啲。
而家出去邊度食飯都少咗人，好多餐廳都比平時注重衛生，去完東龍島返嚟，行過對面入咗呢間食日本海鮮丼，食完真係要俾個手指公讚一讚，真係高質日本魚生，絕對一分錢一分貨，拍拖撐枱腳都絕對唔失禮。
金線鯛 $180
試咗碟金線鯛，魚身表面的確好似有道金線，睇落閃令令，切開一片片後，每片魚肉唔算薄，但仍然靚到透光，小編絕對唔建議食呢度啲魚生蘸醬油食，蘸醬油會染污味蕾，會浪費咗咁高質嘅魚生。
呢款鯛魚入口好有魚味，好新鮮，有淡淡魚肉鮮甜味，食完一片魚肉後，仍然有淡淡餘韻未散去，一定要慢慢先可以感受到嗰份新鮮鯛魚味道。
本鮪三味丼定食 $228
本身係諗住叫丼飯架啦，不過種類太多，好難揀，最終揀咗呢個寫住人氣嘅丼飯，其真係一碗mixed tuna bowl。
定食有丼飯、麵豉湯、茶碗蒸同沙律，呢碗係日式吞拿魚丼，入面有三種吞拿魚，包括吞拿魚蓉同兩種吞拿魚片。本身小編好鍾意食吞拿魚蓉同拖羅蓉，入口軟綿，唔使嘴嚼都食到新鮮魚味，另外兩種魚片小編都唔太識分，紅啲嘅就比較正常吞拿魚口感，淺色啲嗰兩塊就似靚嘢，因為入口係魚嘅油脂比較重，好香魚油味，而且入口係比較軟嫩，魚油味嘅餘韻食完要耐啲先散到。
河豚白子壽司 $38
見到河豚壽司出咗特別餐牌，諗住試一件先。本身小編未食過河豚，入口感覺好似一泡軟淋淋嘅嘢咁，咬開入面好重魚味，質感滑溜，有啲好似潺咁，好特別嘅感覺，兩個人都對河豚刺身本身已由負面變成正面。
鮨玥
地址﹕西灣河鯉景灣蘇豪東A期太康街55號地下GA10B號舖
營業時間﹕12:00 – 14:30；18:00 – 23:00
電話﹕2950 0100
在〈西灣河高質日式料理 歎金線鯛+河豚白子豪返吓〉中有 2 則留言
留言功能已關閉。