何文田高質和牛丼入口即溶碗碗足料

2020-03-15 2022-05-17 / 何文田美食、何文田黃店、和牛、和牛丼、御勝牛、抵食、日本和牛、牛角包、空運、高質 / 作者: 撰文﹕Miss A ；攝影﹕Mr E, Miss A；設計﹕Mr E

何文田勝利道成條街真係好多嘢食，本來諗住食另一間，但行過呢間御勝牛嘅舖頭仔駐足睇咗陣餐牌，呢個價錢食和牛，睇落價錢幾吸引，唔知真定假，不過見係黃店，都走咗入去試。

坐低有酒精搓手液，疫症期間都保持衛生。

勝牛和牛黑白熱狗 $42
第一眼除咗和牛丼飯，其實見到呢個熱狗幾吸引，採用健康竹炭熱狗包，餡料包有日本和牛，熱狗表面灑上芝麻，令食落有陣陣芝麻香味。

竹炭包咬落香脆，感覺好crispy！老闆娘建議最好要用底下張紙包住食，咁啲餡同芝麻就唔會散落，集中喺包內。呢個價錢真係學生餐價錢嚟，仲要係10年前普通魚生飯$30零$40蚊嘅價錢，10年前真係好平嘅學生餐先係廿零蚊，但呢個年代40蚊食到和牛包已經好抵食，估唔到而家拍拖嚟食都係咁嘅價錢。

勝牛和牛丼 $88
想食多啲和牛嘅話就要叫一個和牛丼，一碗和牛丼跟餐有麵豉湯同沙律，幾有心思，兩個人嚟食都覺得好夠份量。和牛粒粒都好香，肉質軟嫩，油脂豐富，有入口即化嘅感覺。白飯選用珍珠米，口感香軟，和牛連飯一齊食時，白飯可中和和牛本身嘅膩感，和牛香口味濃，又唔難嘴嚼，好有牛味，油脂分佈均勻，入口陣牛油香溢出時，真係想食完一粒又一粒。