葵涌向來係工商業重鎮兼舊樓集中地，人口稠密，要找尋一個後花園都唔係易事，不過葵盛東邨、葵盛西邨之間就有一個秘密花園，可從高點俯視葵涌一帶景色，舊式公共屋邨同新型公共屋邨交集，出現於同一畫面，恍惚兩個人於時光倒流間，輪迴於昔日與今日之間。另一邊廂，一條綠色隧道可通往葵涌內一個被政府荒廢嘅好地方，原本係情侶拍拖好去處之一，現時四面被落閘，正常人被禁止進入，公園內明明有兩個維多利亞公園咁大，但政府完全浪費咗一個休憩寶地。
從葵芳上山，穿過葵盛東涌、葵盛西邨，於葵孝街公共小巴總站對面上斜路，頂端會見到葵盛上海水配水庫標誌，沿路會見到宮粉洋蹄甲從山邊延伸出嚟。由於一般配水庫要提供足夠水壓，儲存已處理嘅自來水，所以會建於區內較高處嘅地方，同西方國家唔一樣，西方國家會以水塔形式興建配水庫，其他地方亦會藏於地底，而香港大多數配水庫上都會興建遊樂場或公園，設有康體設施。而葵盛配水庫休憩處亦係葵涌區內一個後花園，雖然無乜設施，但標高柱亦可賞景。
沿斜路上山，盡頭會見到休憩處位置，但大多被樹木遮蔽景觀，而中途既有電塔，亦可到達舊式配水庫倉門，可作為文青打卡位，左右兩邊皆有小路，可通往標高柱位置，分別在於左邊為石路，右邊為山路，而右邊另有延伸小路，不過只為賞景崛頭路。至於起點位置則另有通道可延伸到另一賞景位，沿梯級直上可同時望山下嘅舊式公共屋邨同新型公共屋邨，畫面新舊交替，舊式公屋比較矮，從高點可直視公屋背後風景；而新式公屋則高聳入雲，似足屏風樓一樣，山上亦只能穿過樓與樓之間望風景。
其實，葵涌重有一個更值得去嘅好地方，只係被政府荒廢咗，叫葵涌公園。葵涌公園位於葵涌南面，1979年停止醉酒灣堆填區後，設有行人天橋連接葵盛邨葵福路，該天橋建築設計似足一道綠色隧道，橋底為通往荃灣嘅幾條行車線，人流稀少，構圖不俗，亦可算影相位。葵涌公園面積有27公頃，有兩個維多利亞公園咁大，比九龍公園、大埔海濱公園、東九龍啟德發展區都會公園更大，係全港最大嘅公園，無之一！
本來港英政府於80年代計劃發展葵涌公園為大型市鎮公園，1992年落成時因有沼氣而無限期延後開放，只維持有限度開放，如2008年於園內興建4.48公傾臨時板球場、2009年3.9公傾作香港賽馬會國際小輪車場、2015年再作臨時板球場，多年來曾屢次被康文署、區議會、議員等提出興建唔同設施，開放公眾，但通通只聞樓梯響，2019年5月曾於早上開放板球場兩小時俾公眾散步，但現時葵涌公園四面被圍欄圍封，明明係樂園，公園內大部份草地空間卻依然繼續淪為廢棄地。
葵涌公園同圍都好荒涼，門口掛有「已關閉的堆填區」，標明「未經許可，不准進入」，由2000年康文署重新接管葵涌公園開始，葵涌公園荒廢咗逾20年，偌大公園都被空置，實在太浪費資源，編輯今次寫葵涌公園，只為多一分力量，喚醒有關當局唔好浪費一處寶地。
E.A.Tips :
(1) 於葵芳新都會廣場對面乘搭綠色小巴89M,89S，可於葵盛東邨盛國樓落車，步行約2分鐘可達葵盛西邨1座，再步行約5分鐘即達葵盛配水庫休憩處。
(2) 巴士路線278X, 312, 36, 36B, 40X, 46X, 48X, 94A 可到達大窩口道南遊樂場。
(3) 斜路旁邊另有閘口，有石梯可通往更遼闊景觀，不過會經過山路，部份路段亦無圍欄，需要小心安全。
(4) 葵盛配水庫休憩處並無洗手間或補給點。
(5) 山上有唔少山路分岔口，但大多都係通往維修專用路段，唔係正常山路。
(6) 由葵涌公園返回葵喜街，可穿過工業區，經過粉紅天橋後，返回葵涌運動場、葵芳新都會廣場。
葵盛配水庫休憩處
葵涌葵孝街 
24hours 
2423 3408
葵涌公園
葵涌
