【野餐隨行】赤柱大街歎海邊下午茶逾50年老牌茶檔每日限時賣咖央西多/碎牛菠蘿包重有邊款係隱藏Menu？

一直以為赤柱只有一間能夠支持嘅小店，編輯查看其他同路人平台方才得悉原來赤柱區內重有另一間老牌茶檔可以選擇。而呢間舊式大牌檔模式嘅小店，原來一直屹立市場街有逾50年歷史，鐵皮屋頂招牌亦逐漸褪色，單憑獨特嘅西多士，已經吸引唔少人慕名而至，屬拍拖兩個人歎下午茶嘅好去處之一，編輯就帶大家到海邊，感受真正最Chill嘅海邊下午茶啦！

離赤柱巴士總站只有1分鐘步程嘅舊式鐵皮茶檔，位於赤柱市場嘅開端，就以地道港式美食為主，價格低廉，食物充滿獨特港式風格，招牌之作係西多士、菠蘿包、三文治、多士，另有咖啡、奶茶，甚至各款麵食，例如餐蛋麵、沙嗲牛肉麵或五香肉丁麵，通通適合作三點三下午茶，喺外國西餐廳林立嘅赤柱嚟講，都算係別具一格，當中西多士更加係限時供應。講到店內最受歡迎嘅作品，一定係咖央西多士$30，不時有唔少人因為西多士而於門口大排長龍，到底係咪真係咁高水準呢？

呢間舊式茶檔仍舊堅持以鐵皮屋設計，而鐵皮屋頂上嘅招牌可見泗益二字，於逐漸褪色嘅招牌上可以料到小店係一間老字號排檔，感覺地痞之餘，亦如同穿梭時空。小店旁邊有士多、水果檔，對面則為赤柱市政大廈，泗益背後重有一間叫民益嘅茶檔，不過編輯無打算講。而事實上，泗益屹今已有逾50年歷史，基本上係赤柱人心目中嘅地標之一。

從呢間舊式鐵皮茶檔起步，穿過赤柱市集，向黃屋方向步行，2分鐘就可以前往全長有0.6公里嘅赤柱海濱長廊，橫跨赤柱新街至赤柱廣場，靠近酒吧林立嘅赤柱大街，依循木棧道走，隨便於海邊舖上枱布，自設一個屬於自己嘅餐廳，正對一望無際嘅海景用餐，絕對比店內堂食更Chill！

西多士係叫先會炸，所以等候時間比較長，每份以小小圓形紙碟盛載，亦已預先切開幾份，至少外賣係，你無睇錯，係圓形，因為西多士並非平常嘅方形，所以每舊形狀有少少不規則。麵包沾滿蛋漿，然後掉落滾油，以高溫油炸形成金黃色，上手熱度充足，表面微脆，蛋香味濃郁，似乎既有蛋白空氣感，亦有蛋黃香味。而麵包夠厚身，內裏又能夠保持濕潤，啖啖有柔軟口感，如同魔術師幻術，只不過油份比較重，索一索油會較好。

店內西多士有別於平常港式冰室嘅西多士，並無加添糖漿，皆因麵包內餡已經塗抹滿滿咖央醬，帶上香甜味，甜度已經足夠，甚至有啲甜膩感。西多士上再抹平牛油，令整體油份更重，本來嘅牛油香反而令西多士變得油膩，所以就算係名震江湖，亦並非大多數平台所讚到此西多只應天上有嘅美食。

雖然大多數人只會朝聖西多士，但相對西多士，碎牛蛋菠蘿包$20 反而更令編輯垂涎。基本上，原理就係菠蘿包內夾上鹹牛肉，等同鹹牛肉三文治，只不過外面換成外脆內軟嘅菠蘿包。菠蘿包表皮香脆可口，麵包烘烤過後暖笠笠，內餡加上碎牛肉，炒蛋與鹹牛肉混合，滲透蛋香味，加添鹹牛肉之後添上層次，唔會太鹹，非常香口，而整體又唔會好似西多士咁油膩，反而更令人回味。

店主當日特別推介一款隱藏版嘅炸魚蛋麵$34，於餐牌中全無蹤影，好奇心極重嘅編輯當然躍躍欲試。炸魚本身的確唔錯，外脆內軟，但既然係炸魚，其實唔應該被蓋起，水蒸氣會令炸魚表皮變軟，影響鬆脆口感，尤其外賣，如果好似西多嘅擺放方式就會更好。公仔麵底即使係堂食都算灼得太耐，外賣甚至應該要比堂食淥更短時間，故此現時麵條太軟，並無彈牙質感。

雖然店內奶茶、咖啡係主打之作，但當中鹹檸檬系列更吸引，當中有鹹檸碧、鹹檸蜜$15，平常檸蜜、檸茶、檸水飲得多，但鹹檸檬又如何呢？打開杯蓋，赫然發現內裏就只係幾片檸檬，驟眼睇嚟就似乎同普通檸蜜一樣。一啖入口，檸檬酸爽中帶微鹹，入口鹹鹹酸酸，比一般檸檬更滋潤解渴，原來檸檬係經過特別處理，真係名副其實鹹檸蜜。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 每份外賣需要加$1。

❷ 小店只收現金。

❸ 注意現時營業時間為06:00至16:00，逢星期二休息。

❹ 位置於市場道初段，所以巴士總站向下行就會見到。

❺ 西多士只於下午供應。

❻ 西多士即叫即做，等候時間較長，約15至20分鐘，趕時間就唔好食啦。

❼ 前面係泗益，後面係民益，兩間係截然不同嘅餐廳，前者賣港式小食，後者賣中式粉麵同車仔麵。

❸ 野餐時，自己垃圾謹記自己帶走！

❹ 野餐要盡量使用可循環再用之餐具器皿。

❺ 可以挑選有長櫈嘅地方，會較方便。

❻ 有需要可自備小餐枱、小型露營櫈用餐，可以隨時去到邊食到邊。

❼ 野餐時正對海景用餐會比較Chill。

❽ 最好挑選較少人嘅地方，避免接觸人群。

❾ 野餐地同食肆最好距離不足15分鐘步程，以免食物及熱飲冷卻，有需要就自備保溫袋。

❿ 野餐時最好唔好完全除晒口罩，拉低口罩用餐時一定要拎住食物或飲品。