粉嶺聯和墟最近有一間全新開業的冰室，以茶餐廳菜式為主，屬街坊茶餐廳模式，價格合理，由餐廳名到室內都佈滿同路人，立場鮮明，想拍拖兩個人簡單食吓嘢嘅話，呢間餐廳都可以一試。
冰室一般被認為係茶餐廳前身，以前冰室係由於以飲冰為賣點，主要提供各類冷飲、雪糕、沙冰，早期香港冰室只有小食牌照，僅供應三文治、糕點同飲品，後來先陸續有食肆牌照，提供更多食物選擇，包括小菜、炒粉麵飯等。
而呢間以良之冰室命名嘅餐廳，模式同茶餐廳無異，提供嘅食物款式有好多，無論ABC餐定炒粉麵飯都應有盡有，港式、川菜、潮式打冷菜、星馬菜等都可以搵到，連雞煲、烤魚、水煮魚都有。但種類咁多，又可唔可以靠食物留住客人呢？
蝦醬海鮮炒飯 $45 以小蝦、蜆肉等為材料，蝦醬味濃，偏鹹，飯粒乾爽，夠香口。例湯為紅蘿蔔湯，清甜，總算無味精。至於原汁牛腩飯 $47 就將白飯同牛腩、白蘿蔔分開上，飯量多，牛腩只有少部份軟稔，大多比較嚡口，遍佈肉絲，腩汁略稀，牛味唔夠濃郁，反而白蘿蔔就軟嫩無渣，比較容易入口。
延伸閱讀﹕粉嶺川味米線啖啖魚肉 碗碗辣湯有水準
延伸閱讀﹕【2021賞花地圖】單車路橫越梧桐河 入口有童話風 粉嶺廢村秘地賞木棉花
E.A.Tips﹕
(1) 午市人流都唔少，要預留等候時間。
(2) 基本上午餐都會包例湯同餐飲，凍飲加$3。
良之冰室
粉嶺聯和墟和豐街37-43A號新景樓地下B及C號舖 
06:00 – 22:30 
2513 5088
在〈粉嶺聯和墟茶記大雜燴 良之冰室百搭菜式共冶一爐〉中有 2 則留言
留言功能已關閉。