馬屎埔村(廢村)+悟恫河+木棉花+粉嶺中心紅花風鈴木未開

【2021賞花地圖】單車路橫越梧桐河 入口有童話風 粉嶺廢村秘地賞木棉花

[sig_post_pv label=””] 個人瀏覽過



粉嶺村落眾多,今年頭有一條村落被政府半百人員突襲收地,該村落靠近梧桐河,算係粉嶺區內嘅寧靜小農村,村落入口裝飾感覺似充滿童話風嘅小徑,唔少人都會踩單車經過,更特別係村內可以安靜地觀賞木棉花,適合拍拖兩個人閒遊。

呢條村落離粉嶺聯和墟極接近,只有5至10分鐘步程,由聯捷街轉入馬適街,可見馬屎埔村指示牌,馬屎埔村村口可見馬屎埔村垃圾收集站同村民信箱。甫踏入村口即會見到一道充滿童話風嘅小徑,一個個卡通公仔迎接村民、途人,包括小貓卡通,相當可愛。

村內有一棵棵木棉樹,紅棉盛開,仰天可見一朵朵大紅花懸掛樹上,俯視地上亦遍地紅花,鮮艷奪目,可以於寧靜小鄉村內以靜態方式觀賞紅棉。

沿小路走進,會發現馬屎埔村人跡罕至,村民已經寥寥無幾,發現只有少量疑似村民仍然於農地耕作或養狗。事實上,馬屎埔村本身為非原居民村落,有60至70年歷史,只係50年代被廣東移民人士落地生根,由自己落手落腳建造寮屋,依賴耕種維生,綠悠軒、帝庭軒亦本屬馬屎埔村,簡單啲講現前村口其實係舊時嘅馬屎埔村中心點,高峰期有700幾家農戶。目前仍可見村內幾間小屋被繪上壁畫,雖然稍有褪色,略有殘舊感,但仍可睇到昔日村落風景。



而馬屎埔村8成土地早於1996年已經被恒基地產收購,被計劃發展新界東北,淨低百幾戶村民堅守家園,多年嚟舊村抗爭持續,今年(1月28日)又再被政府突襲收地,政府地政總署、土木工程署、民政署、顧問公司、承建商、警方半百人員到馬屎埔村執意收地,甚至出動防暴警員,政府人員稱早前已通知村民需要遷出,並已張貼通告,馬屎埔村於2019年12月27日已經復歸政府,惟部份村民揭露政府事前其實未有如期通知部份村民。

現時,馬屎埔村唔少地方已豎立鐵絲網,寫明禁止進入政府地方,蕉田已所餘無幾。村內更有一處滿佈可愛嘅泥人公仔,為泥人回村創作,村民於2007年以城鄉共生為題嚟堅持守護家園,更於2010年建立馬寶寶社區農場,支持本土農業,專做有機生產,消化廢棄廚餘同乾草,種得嘅新鮮有機菜會於社區農墟售賣。村民曾指恒基為地霸,但恒基方面就曾批評馬屎埔村為租霸,收地程序為合情合理合法,政府亦曾向受影響合資格村民發放最高60萬元津貼,不過唔少村民因只得臨時屋牌照而不符合資格,到底係官商真逼遷以囤積農地,係定村民演變為租霸?誰是誰非,已經無人知。

穿過馬屎埔村,會發現呢條村落幾受單車友歡迎,不時可見單車穿越馬屎埔村,由村口小路直入到尾,會發現另一邊係梧桐河畔。梧桐河為北區邊界支流,英文名River Indus同印度河一樣,由英殖時期印度籍測量師命名,河流連接多條小山溪,包括紅花嶺、禾徑山、沙頭角公路、萊洞、馬尾下、橫嶺、軍地至小坑村,甚至龍躍頭、烏鴉落陽至上水北部、虎地坳、羅湖。

將來馬屎埔村會變成點,我哋唔知,只係知道鄉村將會被拆毀,天然空間亦會一個個被石屎活埋,一日唔控制邊境進入嘅人口數目,鄉郊地方逐個消失吞噬,都係目前可以預見嘅畫面。

延伸閱讀﹕3小時長征港版萬里長城!華山軍路連綿芒草 上水紅橋新村行到粉嶺坪輋壁畫村 黃昏坪洋白茅草原打卡

延伸閱讀﹕粉嶺聯和墟平價泰國菜 必食超濃船河湯底牛湯粉


E.A.Tips :

(1) 於粉嶺市中心乘搭小巴路線52A,54A,56A,可以於帝庭軒站落車,步行到馬屎埔村只係幾分鐘腳程。

(2) 謹記入村仍要保持安靜,唔好喧嘩。

(3) 愛護環境,自己垃圾自己帶走。

(4) 地上有唔少木棉花,不妨拎起嚟影吓相啦。

(5) 馬屎埔村不時有單車經過,記得要讓路單車,以免發生意外或爭拗。


(6) 粉嶺中心天橋嘅紅花風鈴木於2月下旬仍然未完全開花,只有一小朵已開花,估計一至兩星期會完全開花啦!


馬屎埔村

香港新界粉嶺北
24hours

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


在〈【2021賞花地圖】單車路橫越梧桐河 入口有童話風 粉嶺廢村秘地賞木棉花〉中有 2 則留言

留言功能已關閉。