長洲小店係最多良心小店嘅離島，小店繁多，兩個人拍拖揀嘢食未必一定只係去文青咖啡店嘅，重有好多更值得推介嘅食店。呢間主打蕃茄湯底、酸辣米線嘅餐廳就係其一，店面地方唔大，但質素上確實有水準！(堂食圖片為較早前拍攝)
餐廳標明湯頭係全部用新鮮豬骨湯製作，亦有13種主要配料同5款配菜可供選擇，相當自由。必食嘅係招牌蕃茄湯，可挑選一菜、一肉、一粉，主要配料有肥牛、札肉、鴨胸、豬肚、腩肉、牛筋、豬頸肉、豬軟骨、汁煮豚肉、魚腐春卷、魚蛋春卷、四寶丸、芝士竹輪春卷，配菜有金菇、秀珍菇、時菜、響鈴、溏心蛋，款式眾多。
編輯今次揀選豬頸肉拼秀珍菇拼蕃茄米線，蕃茄湯底濃郁鮮甜，碗內有粒粒蕃茄肉，配搭車厘茄，將兩種茄肉混合，難怪湯頭極重茄味。美中不足只係蕃茄湯底完全蓋過主打嘅新鮮豬骨湯味，湯頭豬骨湯味變成配角，連豬骨味都唔太飲得出。不過，湯底濃稠，茄蓉滿佈，米線麵條可以沾滿蕃茄湯汁，酸甜味醒胃又美味，順滑，足料。至於豬頸肉份量唔少，肉質唔算太軟稔，但唔嚡口，味道靠蕃茄濃湯。
自選湯麵就挑選咗芫荽皮蛋湯配米粉，米粉軟硬適中，再配牛筋、蘿蔔、豬軟骨，芫荽味濃，內含皮蛋，湯頭清甜，自選配料都足料，牛筋軟嫩，蘿蔔無渣，豬軟骨就夠入味，肥瘦適中，煮得淋身而有咬口。
E.A.Tips﹕
(1) 有時候小店會大排長龍，但有時候又唔需要排隊即可入座，避過食飯時間或者會好啲。
(2) 室外有少量座位，會比較少人坐，比較快有位。
(3) 先於紙上點餐，最後到櫃台埋單就得。
(4) 多一種配料加$9，加底加$6；餐飲最平豆漿，加$6至$9。
(5) 有4種湯祗可擇，有清湯、蕃茄湯、酸辣湯、麻辣湯。
火車頭酸辣小窩
長洲新興街36號地下
星期一全日休息；星期二至五 11:30 – 21:00；星期六至日 11:30 – 17:00；公眾假期 11:30 – 17:00 
2981 2022
