【野餐隨行】北角潮州飯店高水準鹵水鵝片尋海旁小型狗公園野餐

於北角找尋野餐店唔難，隨意都可以於海濱公園面向海旁用餐，而且交通方便，電車、巴士都好接近，但拍拖兩個人要去人流唔多嘅地方用餐就唔容易，今次就搵到一幢大樓背後嘅小型狗公園，同時帶同區內一間主打潮州菜嘅飯店出品去野餐。

區內有一間位於市中心嘅潮州店，眾所週知，潮州菜分為兩種，一種係較低檔嘅潮菜，通常指打冷菜式，而另一種就係較高檔嘅潮粵菜，一般於酒樓出現，其中滷水鵝就係潮州菜嘅著名菜式，故潮州菜唔係一定佬味十足嘅菜式。而北角呢間潮州飯店，就似乎兩種都有，亦滷水鵝為主打，店外玻璃窗透視一隻隻浸滿滷水又油光滿滿嘅鵝肉、雞肉，光從玻璃外面觀望，已令人垂涎。

你大概未必估到一幢ICAC總部背後，會有一個海旁小公園，而且係一個歡迎寵物進入嘅寵物友好公園，位置係民康街遊樂場，本身其實有啲騎呢，地方偏僻，遠離住宅，地面凹凸不平，狗隻放空點少，中間又多花槽、座椅，到底係歡迎人到定狗到呢？公園最大優點只係靠近海旁，不過仍然不時有主人帶同狗隻進入散步，而公園入口亦有小閘口，海旁更有圍欄，保障場內寵物安全。

店內招牌菜式有酒香鵝肝、滷水鵝、潮式凍烏頭、滷水拼盤、芝士蝦棗、黃金糖醋麵等，而精品滷水有滷水元蹄、豬大腸、豬頸肉、腩肉、貴妃雞、叉燒，滷水鵝，另有招牌太平鵝肉炒飯，當中滷水鵝片飯$68 絕對係必試之選，轉瀨粉就要加$5。

瀨粉都幾彈牙，內有幾塊椰菜，湯底只係簡單調味，至少唔係味精。一份鵝片飯或粉有約7至8塊鵝肉，片片切得偏薄，每塊都已經起骨，油光充足，肥瘦均勻。鵝皮香口，皮下脂肪唔算多，而且係啖啖肉，滷得入味，滷水香逐漸滲透出嚟。不過，鵝肉肉質唔乾柴，但就比較實淨，較難咬開，鵝皮就比較吸收滷水汁精華，花椒八角滷汁香濃，但又唔會過鹹。而滷水汁比較少，只係足夠蘸鵝肉，如果配搭白飯，就未夠滷水汁用作撈飯。

至於鮮甜蠔仔肉碎粥$52 就係一般打冷嘅選擇，粥份量唔少，拎到公園仍然熱焫焫，粥底呈奶白色，泡飯沉底，水份較多，但米量都係重身，蠔仔肉粒粒飽滿，略有蠔鮮味，而蠔量適中，配搭肉碎等配菜，整體偏鹹。

附送老火例湯或熱飲，當日例湯以粉葛、蜜棗、豬肉、南北杏、陳皮煮成，整體蜜棗份量甚重，蜜棗太多令湯由甜變得微微甘苦，而湯水偏鹹，甚重味，飲完有口渴感，估計有落味精，選飲品可能會較好。

撇除寵物公園嘅問題，於小公園野餐，既可享維港靚景，亦可眺對岸九龍灣至觀塘方向，海中心有一道高速公路，場內座椅頂端更有首冠藤嘅花堤靚景，環境清靜，人流極少，可以放空，都算係北角區內一個秘密公園。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 民康街遊樂場入口靠近渣華道。

❷ 謹記出入公園要關上小閘口。

❸ 野餐時，自己垃圾謹記自己帶走！

❹ 野餐要盡量使用可循環再用之餐具器皿。

❺ 可以挑選有長櫈嘅地方，會較方便。

❻ 有需要可自備小餐枱、小型露營櫈用餐，可以隨時去到邊食到邊。

❼ 野餐時正對海景用餐會比較Chill。

❽ 最好挑選較少人嘅地方，避免接觸人群。

❾ 野餐地同食肆最好距離不足15分鐘步程，以免食物及熱飲冷卻，有需要就自備保溫袋。

❿ 野餐時最好唔好完全除晒口罩，拉低口罩用餐時一定要拎住食物或飲品。

EATWO

Miss A

【區區有小店2024】荔枝角23間尚存本土餐廳推介！肉蛋吐司／脹卜卜餃子／工廈Cafe｜荔枝角美食推薦2024

兩個人旅吓行

專題

E.A.Tips :

太平飯店

民康街遊樂場