香港單車館公園吉野櫻鐘花櫻桃

【2021賞花地圖】港版吉野櫻綻放將軍澳單車館公園 雨中粉嫩山櫻花閃現浪漫景象



以本地櫻花嚟講,將軍澳嘅香港單車館公園都算係非常出名嘅櫻花地之一,每年都種植櫻花樹之餘,亦交通方便,唔少人都跨區賞櫻,幾棵櫻花樹數目唔多,而且分隔開,但園內足足有兩種櫻花,包括吉野櫻同鐘花櫻桃,每朵櫻花細小又精緻,粉嫩狀態嘅小櫻花於雨中更出現極浪漫嘅景象。

香港單車館公園每年都有櫻花樹,今年除咗屬於山櫻嘅鐘花櫻桃,重有吉野櫻。鐘花櫻桃係台灣品種,又叫Taiwan Cherry,花期為2月下旬至3月,單車館公園嘅鐘花櫻桃一般花期較其他地方長,有時3月下旬至4月都會見到,盛開時花開燦爛,由5片粉紅、白色花瓣組成,緋紅花瓣配嫩白花蕊,一隅形成粉紅又雪白嘅小型花海。



至於吉野櫻就係東京櫻花,即日本櫻花,原產自日本,全名為染井吉野櫻,來自江戶至明治時期嘅江戶染井村,即現時嘅日本東京都豐島區,為人工種植,後來因奈良縣吉野山而出名。

吉野櫻有5片花瓣,剛綻放時淡紅,完全盛放會轉為白色,目前記者所見吉野櫻大多介乎白色至淡粉紅色,花期為3至4月,而韓國濟州島嘅野生濟州櫻同吉野櫻亦有幾分相似。

目前唔需要去日本,又或者台灣陽明山,都可以睇到吉野櫻,絕對值得兩個人拍拖影吓相!


E.A.Tips :

(1) 櫻花位置需穿過香港單車館公園室內場地、牧羊少年咖啡館同人工湖,靠近後面草地位置。

(2) 櫻花花期偏短,賞櫻時間有限,想睇就要趁早啦!

(3) 由將軍澳站公共運輸交匯處、Pop Corn商場或將軍澳廣場為起點,步行到香港單車館公園入口,腳程約10分鐘,再步行約5分鐘即可到達櫻花位置。

(4) 謹記保持安靜,睇花係用眼,唔係用把口。

(5) 愛護環境,垃圾要扔棄垃圾桶內。


香港單車館公園

將軍澳寶康路105-107號
07:00–23:00
2878 8621

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!