小編曾經去過葵涌中心地下一間賣超平日式飯嘅微舖，今次去埋隔離呢間主打越南河Pho嘅小店，兩間都係同路人，以街坊價錢提供標準食物，幾時都話拍拖兩個人要幫襯一定係先幫襯小店。
餐廳位處簡陋商場之內，商場人流本身唔多，大多都係附近居民或打工仔，而且瑟縮於小巷內，事實上唔難被人發現，味道雖不算高水準，至少尚算標準。
既然以越南河為主打，先揀一碗越式生牛肉湯河 $38。即使有河粉、檬粉、金邊粉揀，小編都係揀選生牛河，會更傳統。湯底內有微微牛骨味，甚至魚露味，雖然唔係正宗牛骨湯咁重牛骨味，但入口總算標準。薄切牛片份量唔多，比較韌同難咬，但配料繁多而充足，包括蔥花、芫荽、金不換、指天椒、青檸仔，更有菜底，都算地道越式湯河，配料味道幾強，補救其他不足之處，尚可提升層次。
豬頸肉凍檬 $55，份量唔少，豬頸肉唔嚡口，烤得少少乾，但入口都軟身，幾香口，有肉汁，醃料唔太鹹。配料同樣豐富，包括有辣椒仔、青檸汁、魚露，內含菜絲，檬粉淡口，而醬汁帶酸甜味，撈檬粉都算醒胃，只係唔太驚喜。
E.A.Tips﹕
（1）小店位處另一良心店野菜咖哩事務所旁邊，從地下走入葵涌中心商場即會見到。
（2）基本上都會附送飲品，如熱低糖綠茶、港式飲品，不過港式檸蜜嘅檸檬唔太靚。另外，加$6至$8就可升級其他飲品。
（3）如要外賣，建議一定要叫分湯，否則河粉索晒湯就會變成糊狀。
（4）餐廳除咗越式菜式，重加入迎合本地人嘅港式菜式。
珍味泉越南粉
葵涌葵興路100-102號葵涌中心地下A15舖 
星期一至五 07:30 – 17:30；星期六 07:30 – 17:00；星期日全日休息 
2610 2926
在〈葵涌隱蔽商場藏街坊價越南河 湯底標準勁多配料〉中有 2 則留言
留言功能已關閉。