提到食燒賣、魚蛋呢啲小食，元朗起家嘅呢間小食店一定係佼佼者，官方講到明「燒賣係黃色」，絕對係本地情侶兩個人拍拖掃街必食之選！呢間燒賣皇后分店先開到荃灣、旺角，最近更進駐紅磡、灣仔，非常方便。
最出名係自家製嘅燒賣，$20有魚蛋燒賣孖寶，招牌香菇豬肉燒賣大大粒，確實足秤，豬肉餡料飽滿圓潤，貌似豬腩肉，略帶肥膏，有新鮮豬味，重有冬菇、鯪魚肉等，入口札實，夠彈牙，表皮夠薄，帶濕潤感，原來除咗傳統燒賣，重有炸燒賣添！至於自製白魚蛋反而細細粒，純白魚蛋感覺健康，入口魚肉香，亦算彈牙，味道比較淡，僅以辣椒油調味。
味道可自選香辣、咖哩、沙嗲口味，香辣味即係皇后辣椒油、手工豉油，醬汁辛辣味初時辣度稍重，好搶味，其後食落香口，唔算太辣，甜豉油好配合香辣味，蘸辣椒油可以加分。
而瑞士雞髀 $25 亦夠大隻，醬汁夠濃味，雞肉不過不失，價錢偏貴，但總算夠衛生。
E.A.Tips﹕
(1) 小店係小食店，可堂食可外賣，外賣加$1，堂食都只係外面食，無座位。
(2) 拎上手雖然暖笠笠，但拎到返去會變涼，謹記翻熱時要將膠盒轉用碟。
燒賣皇后
紅磡德民街2-34E號黃埔新邨地下4J號舖
