[sig_post_pv label=””] 個人瀏覽過
講到屯門最多嘢食嘅地方,唔係屯門市中心,而係紅橋。一間又一間良心小店屹立紅橋附近,由港式到台式,以致日式、西式,甚至快餐都有,今次編輯先為大家推介當中3間值得兩個人去懲罰嘅小店,拍拖去撐枱腳都好適合!
(1)木玥巷
第一間係以台灣菜為主打嘅木玥巷,餐廳處於轉角位,裝備採木系設計,大窗採光充足,座位舒適。菜式既有台式牛肉麵,亦有創意特飲,午市套餐低至$48,紅燒牛肉麵嘅湯底最令人印象難忘,湯頭有別於平時嘅牛肉麵,並非濃味而帶辣,反而調校得恰到好處,雖然偏深啡色調,但湯頭採牛骨熬煮,同時有燉煮出嚟嘅牛味,入口有啖啖回甘味,原來係半島大廚炮製!
(2)有料案內所
第二間係一間以日式為主嘅有料案內所,無論店名定裝潢,都有大阪街頭風格,非常搶眼!小店主打甜品,尤其係日式梳乎厘班戟、窩夫、奶蓋刨冰,後來加入午市套餐,價錢最平係$47,而份量唔會太少。當中,有日式炒麵、炸雞、煎餃等,最特別係Wasabi crossover明太子章魚燒,並非滿口粉漿感覺,內餡章魚粒既有咬口,明太子帶鹹味,亦有Wasabi微辣嗆鼻感覺。
延伸閱讀﹕【此黃不同彼黃】無料變有料案內所 全新日式午市套餐最平$47
(3)The City Corner
第三間係最靠近巴士站一邊嘅The City Corner,貌似一間典型Cafe,環境闊落,為三間當中最舒適。餐廳以西式菜式為主,價錢尚算合理,意粉、意大利飯應有盡有,但更值得試嘅係漢堡包。從餐牌可見,小店有足足7款漢堡包,每款包含唔同材料,牛堡以手打牛肉為餡料,配合車打芝士、煙肉、蕃茄、酸甜青瓜、沙律菜,層次豐富,而Burger夠厚,切落去切口夠完整,唔會散晒,另有薯條作配菜,份量充足,食得飽肚。
E.A.Tips﹕
(1) 乘搭巴士路線46,46X,53,67M,67X, 258P,261,267X,A33X,K51 可到達景峰花園,沿樓梯步行落去青棉徑,直行到菁雋之前路口轉入去,可以搵到兩間,再轉入井財街,直行會搵到另一間。