幾個月前小編同幾個閨蜜去咗馬會個活動Spring Racing Carnival Semi-Buffet,join咗佢個粉紅盛事Party,有半自助餐食又有嘢玩,仲可以近距離觀賞賽事,無論係幾個朋友,定兩個人拍拖去,都可以好開心玩足半日。
嗰日我哋仲見到靚女主持莎拉添,活動入面好多打卡位以Pink同花花Pattern為主。
飲品有西柚汁、橙汁、蘋果汁,飲酒嘅朋友都可以揀酒精類飲品。
Semi-Buffet有特定主菜之餘,亦可去自助吧枱攞嘢食,似足Sunday Brunch。有多士、麵包、曲奇、酥餅、芝士揀,魚生刺身有三文魚、吞拿魚、魷魚等,好鮮甜!仲有沙律、水果,亦有牛肉批、烚三文魚、火腿,仲有新鮮海鮮冷盤供應,有凍蝦、藍青口、螺等。
主菜有4款﹕
青豆意大利飯餅伴豆芽配蕃茄汁
將青豆同意大利飯磨成蓉,之後打成餅狀,煎得勁香口惹味,口感似薯蓉,青豆同飯變得好滑溜,加上蕃茄汁夠清新,減少油膩感。
燒美國肉眼配芥末籽汁伴焗薯仔及蜜餞香橙、甘筍、青豆
煮到7成左右嘅肉眼扒好惹味,肉質軟腍,有好濃郁嘅肉味‼有油脂香但無太多脂肪,配芥末子汁可減少油膩感,連伴菜都好花心思,旁邊以為係帶子,點知係薯仔。
烤西班牙黑毛豬肉漢堡包伴車打芝士、烤燈籠椒、啡菇、薯條
漢堡包中間嘅烤黑毛豬肉超厚,好足料!一刀切落去見到豬肉更睇到好厚,黑毛豬肉同啡菇、燈籠椒、車打芝士一起烤焗,好香。芝士係半溶狀態,流到啡菇、豬肉勁惹味,不過Miss A覺得薯條有啲鹹……..
燒黑銀鱈魚柳伴意大利脆煙肉、香檸牛油汁薯蓉及法邊豆
上面有塊脆卜卜嘅煙肉,下面就係香檸牛油汁,旁邊有薯蓉、法邊豆,魚肉質感軟滑,好新鮮!魚肉好清生,蘸上煮過嘅牛油汁,好正。
自助吧枱多款甜品有蛋糕及慕絲,仲有任食Häagen-Dazs雪糕!有曲奇、士多啤梨、朱古力、雲呢嗱、覆盆子、芒果唔同口味。
食完仲有杯活動主題特調飲品,杯嘢好靚啱晒我哋打卡,味道似凝固後嘅啫喱,無酒精架!對唔飲得酒嘅Miss A嚟講都好啱飲,味道甜甜哋,上面朵花都食得架!
「粉紅盛事」Spring Racing Carnival
供應日期﹕2019年4月7日 (星期日)
供應時間﹕12:00 – 17:00
位置﹕沙田馬場Hay Market喜馬當先餐廳
地址﹕沙田馬場第2座看台2樓
價錢﹕港幣$365/2位(活動僅限年滿18歲人士參加)
電話﹕1817
主持﹕莎拉 Scarlett Cheng
衣著主題﹕以春夏花花Pattern服飾為主題,特設「最具春夏氣息服飾大獎」,勝出者獲贈HK$1000馬場餐飲禮券
*每個月都有,當時下次活動日期﹕2019年5月11日(星期六)