天氣炎熱，夏天想行山又唔想太辛苦？加上要避開人頭湧湧嘅山頭，可以試吓行可以避世嘅道風山，由沙田市中心為起點，徐徐上山路程僅30分鐘，路段輕鬆，人流稀少，靈修地可觀賞山下風景，亦有超吸睛嘅巨型白色十字架同中式教堂，十字架帶有神聖又浪漫嘅感覺，適合炎夏下拍拖輕鬆閒遊。
道風山由30年代已經建成，有足足90年歷史，雖然教會曾拒絕作法定古蹟，但就被列作香港二級歷史建築，最吸引嘅地標係道風山十字架，其他地標有道風山基督教叢林、雲水堂、基督教香港信義會道風山堂，道風山原本係來自道風山基督教叢林，由挪威傳教士Karl Ludvig Reichelt牧師創辦，作於本地招待佛教、道教徒學道同傳道之用，並由丹麥建築師Johannes Prip-Moller設計。
由沙田排頭村村屋為起點，沿沙田鄉事委員會旁邊小梯級拾級而上，小路可以步行上山，路段全為石屎路，大概行15分鐘，可到達中途唯一分岔路，迴旋處旁邊為友愛村，再沿道風山路繼續向上行走，15分鐘可直上山頂，可以觀望沙田區風景。
沙田排頭村村屋為起點，沿沙田鄉事委員會旁邊小梯級拾級而上 
大概行15mins，可到達中途唯一分岔路 
分岔路向右邊走 
沿道風山路繼續向上行走 
15mins可直上山頂 
途經一個路牌昇天屋, 可沿樓梯直上白色十字架. 如果想從頭由正門開始瀏覽, 則繼續向上行走 
路口轉右 
進入道風山園區
甫進入道風山，通過閘門就係道風山基督教叢林，即可感受充滿古色古香味道嘅龐大建築群，小橋流水環境優美，山上有唔少青翠碧綠嘅草地，整個空間有避世感覺，既係一幅絕美風景畫，亦係靜修好地方。當中，位處山上嘅聖殿為中式教堂，不時會舉辦活動，屬於充滿中式園林建築色彩嘅基督教地方，教堂頂部為攢尖頂，下面亦有吊鐘，將中式建築同西方十字架結合，瞬間有中西合璧之感。另外，聽聞附近仲有一個似足外星人降落地球嘅圓形麥田圈，叫做名陣，亦係靈修默想嘅地方，不過小編沿車路上見唔到。
將中式建築同西方十字架結合 
聖殿可遠眺萬佛寺 
繼續沿十字架方向行走，路段基本只夠一個人行，所以要特別小心，穿梭山林後可以發現生命門後就係中式庭園，內感恩亭同巨型十字架。整個十字架目測樓高兩、三層，有12米高，頂頭寫有「成了」兩個字，只係經過90年歷史洗禮後，帶有幾分滄桑感，十字架都開始生銹。
進入建築群 
沿小路去十字架 
靠左直去可見十字架
企喺十字架底仰望，十字架非常巨大，馬上感覺到自己有幾渺小，令十字架增添神聖感覺，而純白色設計亦同時有幾分浪漫感。山頂上感受微風吹拂，望向山下沙田區建築物，環境清幽，相當舒坦，絕對係市區一片靜謐之地。
遠眺城門河 
延伸閱讀﹕沙田街坊小店手卷駅 便當丼飯性價比高
E.A.Tips﹕
（1）巴士路線49X/86K/88K/170/269D/299X、小巴路線82號都可抵達沙田，起點位處小巴站同天橋底，由沙田排頭村直上即達。
（2）沿路會經過花草叢林，不時有蚊隻，最好帶備防蚊噴霧。
（3）道風山為靜修地，記得保持安靜，當日小編臨走見到一行幾人帶同小朋友、家傭到達巨型十字架，說話聲量非常大，口中說話為廣東話夾雜單字英文，父母應當俾一個好榜樣同教育子女，適當時候需要放輕聲量，保持真正香港人嘅質素。
（4）部份地方如神學院為私人地方，唔好隨便進入。
（5）兩個人想拍攝充滿神跡感覺嘅照片，不妨調轉位置背光而拍，但要小心唔好行近山邊緣。
（6）沿山路行有幾個路口都可以進入道風山十字架，中段有幾條樓梯為shortcut，亦可以行到盡頭沿車路進入。
（7）道風山服務處有一部汽水機，可以作補充之用。
道風山基督教叢林 / 道風山十字架 / 基督教香港信義會道風山堂
大圍道風山路33號
09:00–17:00，星期六日休息，十字架則24hours
在〈30分鐘上道風山 睇巨型純白十字架連中式教堂〉中有 6 則留言
留言功能已關閉。