遊東涌寺廟群山上靜土石門甲行1小時直上昂坪營地仰望人氣木刻群心經簡林

[sig_post_pv label=””] 個人瀏覽過

由東涌去昂坪，遊客必揀昂坪360纜車，但本地人梗係唔搭藍綠色為主調嘅纜車啦，東涌雖然同時有大嶼山巴士路線可直達昂坪，但週末由等車到搭車，時間分分鐘虛耗2至2.5小時，拍拖兩個人去就浪費4至5小時。既然如此，倒不如步行過去，2至2.5小時已經可以步行至昂坪廣場。

從東涌市中心起步，穿過裕東苑、北大嶼山醫院、逸東邨，步行至東涌道，可以順道窺探東涌炮台，沿路前行至東涌道、羅漢亭分岔路口，轉入石門甲道內嘅石門甲巴士總站，僅約30至40分鐘腳程。

延伸閱讀﹕東涌馬灣新村咖啡店飲薑汁Latte 見字飲啡濃而有新意

石門甲村可作昂坪路線嘅起點，走入村路，沿途有指示牌，路線清晰，緩緩直上，可經羅漢寺前行至地塘仔郊遊徑，然後直上昂坪。昂坪最出名嘅係近500米高嘅天壇大佛、寶蓮寺，而石門界至昂坪路段法門古道內佈滿多個大大小小嘅寺廟，包括規模龐大嘅羅漢寺、十方道場、法林禪院、華嚴閣、法航精舍、寶林寺，感覺和諧，滿滿佛教氣息。而下山人比上山人多，比較少人會上山，非常清靜，路段總算佛門清靜地，充滿佛教氣息，地上更可見石蓮，的確係休養生息好地方。

由山腳法門古道行到山頂東山法門，需時約1小時，需要一直上坡，分岔路口唔多，不過途中景觀良好，樹林茂密，碧綠青翠景致盡收眼底，中途不時有漕溪、石澗，可作歇息。沿路繼續上斜，背後可近距離俯視壯觀嘅赤鱲角機場，目前係可遠觀而不能前往乘搭飛機嘅地方，景觀尚算開揚，最終會步行至昂坪逾400米高位置，雖然不時有樹蔭，而且距離唔遠，中途亦可見有人耕作，但攀上一級又一級石級、上坡路段的確稍花力氣。

眼見東山法門牌坊，即代表到達昂坪營地山頂位置後，總算復歸平緩小路，內有無敵海景。營地對面係彌勒山郊遊徑，另一邊走5分鐘左右可到達人氣景點心經簡林，位置開揚，既可望鳳凰山，亦可望大東山山脈。

近年，昂坪山上嘅心經簡林成為人氣打卡位，穿過昂坪奇趣徑即達。事實上，心經簡林內僅為戶外木刻佛經群，37條木柱有高有低，排列整齊，採用花梨木，以木雕方式，每一條木柱都刻有一句《摩訶般若波羅蜜多心經》，加上背山面海，本來係清幽靜土，目前反而比昂坪市集更多人！該37條木柱係來自國學大師饒宗頤教授，當時香港政府將其墨寶轉為大型戶外展覽，於昂坪山上建造心經簡林，不過工程歷史3年，足足耗資950萬港幣，其後保養又花費90萬港幣，到底係咪真係值得建造？

唔少人大概純為打卡，忘記咗進入佛教地方或寺廟要保持安靜，現時走入心經簡林，似足走入一個熱鬧街市。事實上，相信唔少人都唔清楚《心經》原意，經文簡單，但內含深奧意思，既要拋開色、受、想、行、識，又要六根清靜，重有十善、八正道，《心經》係儒、釋、道三教共尊寶典，佛祖釋迦牟尼就係佛教嘅起源。

E.A.Tips :

(1) 大嶼山巴士路線23號可以從東涌市中心巴士總站直接上到昂坪市集旁邊巴士站；而大嶼山巴士路線34號亦可到達石門甲邨，可直接到達石門甲邨，然後再上山。

(2) 事實上，大嶼山巴士路線於週末尤其多人，東涌市中心巴士總站週末嘅等車人龍更加係有頭無尾，而且除咗前往逸東邨嘅巴士，大部份班次都唔算極頻密，人多時分分鐘企定定等候逾30分鐘至1小時先可以上車，然後點對點全段車程又要坐50分鐘。

(3) 建議行得嘅人就用對腳行路去，分分鐘比巴士更快捷，以東涌市中心巴士總站至石門甲村鄉公所，腳程只係約30至40分鐘。

(4) 由石門甲村步行上山，約1小時至1.5小時可直上昂坪營地，分岔路口前行5分鐘即達心經簡林，由心經簡林返回昂坪廣場，腳程亦只係10分鐘，基本上營地之後都為平路。

(5) 此路段寺廟、佛像繁多，原為佛教靜土，呢度唔係街市，謹記保持安靜。

(6) 記得自己垃圾自己帶走。

(7) 上山路段比較陡峭，要帶備充足糧水先至出發。

(8)石門甲道內石門甲村鄉公所對面有公廁。

(9)昂坪營地於疫情期間已經封閉，本身設施有大中小營位，煮食爐位、枱櫈、污水穴、洗手間。