[sig_post_pv label=””] 個人瀏覽過
元朗國有唔少美食，離元朗廣場只係5分鐘步程，小街道匿藏一間價廉物美嘅日式定食小店。呢間日式小店命名簡單，以稚為題，店內果然都係年輕一輩，食物唔花巧，無太多包裝，提供簡單日式定食，如果單純食兩份定食套餐，拍拖兩個人去醫吓肚亦可以$200有找！
小店地方唔大，門口有玻璃窗，透視廚房煮食狀況，室內以日本動畫設計，裝潢有舊日本感覺。餐牌寫明主食均可配上定食套餐，有8款主食任揀，包括招牌蒲燒鰻魚飯、吉列豬扒飯、汁燒豬軟骨飯、香烤雞扒飯、日式和風牛肉飯、海鹽燒鯖魚飯、泡菜炒豚肉飯、豚肉生薑燒飯，由$60至$122都有，豐儉由人，加$30包含前菜、漬物、煎茶、味噌湯、珍珠米，甚豐富。
前菜雖為簡單料理，但選材有心思，有別於一般定食，以胡麻醬配搭滑溜嘅玉子豆腐、調味海蜇，相當開胃。味噌湯內含豆腐粒、冬菇片，唔算太鹹，反而有味噌香。至於煎茶，係比較清淡嘅茶，略有茶香，呷下口會發現稍有菊花香味。加上以日式托盤盛載定食套餐，擺盤精緻，似足日本開餐。
一款定食挑選咗招牌蒲燒鰻魚$72/半條、$122/原條，半條鰻魚份量亦適中，魚質肥美嫩滑，魚肉夠厚肉，燒製時火喉控制得好，魚皮焦脆，魚肉彈牙，無骨，有油脂香，唔太肥膩，醬汁略有微微甘甜，旁邊有大量爽脆椰菜絲沙律，可解膩。珍珠米飯份量充足，暖笠笠，粒粒飽滿，入口煙韌，表面有少量紫菜碎等點綴。
日式和風牛肉$60 撈飯一流，提供海量牛肉，可以舖滿一大碗，份量足夠，牛肉夠入味，牛肉汁唔太鹹，配料除咗帶清甜味嘅洋蔥、香蔥，亦同時灑上用作調味嘅七味粉，味帶香辣，令和風牛肉味道提升。
厚燒玉子$30/4件係日式家常菜，以雞蛋、高湯炮製，今次玉子僅略有甜味，甜味唔重，有足夠蛋香味，尚算滑溜，配上少量醬汁、木魚碎、紫菜，令整體增加層次感之餘，畫面亦夠豐富。
味淋雞泡魚干$42 燒得香口，以表面有惹味燒汁，鹹中帶甜，色澤光鮮，表面稍硬身，入口逐漸變軟，並非乾柴感覺，配上沙律醬又可以減低燒製魚干滲出嘅鹹味。
E.A.Tips﹕
(1) 珍珠米加$10可轉舖上木魚花同熱溶牛油嘅貓飯、茶漬飯或湯烏冬，加$10有自家製溏心蛋1隻。
(2) 午市定食時間為12:00至14:15，而晚市定食時間為18:00至21:15，有串燒、小食、飲品等。
(3) 由元朗廣場步行到小店，腳程約5分鐘。
(4) 午市會比晚市平，不過最好避開食飯時間，因為座位比較少。
稚
元朗俊賢坊18號權益大樓3號舖
12:00 – 15:00；18:00 – 21:30 
3590 4758
