Urban Quit 離。城

18款香草任摘+可玩柴火! 錦田全新露營地仰望雞公嶺 設備齊全有熱水供應 10分鐘到市中心

[sig_post_pv label=””] 個人瀏覽過





郊野地方被封閉,本地露營地需求日增,最近錦田就有一個全新露營地,位置交通方便,靠近錦田樹屋、平湖,而且場內可直視雞公嶺,現時屬較少人露營地點,感覺悠閒,最適合拍拖兩個人或三五知己到營地Chill返吓㗎啦!

位於錦田嘅全新露營地 Urban Quit Garden 離。城,於近月先開始試業,屬2021年香港收費營地,私人營地擁大片碧綠草地,置身草地上可望雞公嶺,值得推介。編輯向來鍾意露營,感覺可遠離繁囂,為心靈暫時找上一片靜土,加上現時無得搭飛機出國旅行,於城市內露營既可享受慢活,即使未飛得住亦可先作一個文青小旅行。

呢個營地最特別之處莫過於可以於安全情況下體驗劈柴同任玩柴火,當中有松明木、荔枝木、雜木柴,甚有趣。另一個特別之處係場內有一個香草架,提供多款香草,可供營地嘅人任摘,足足18款香草可以免費採摘,包括有臭草、芫茜、羅勒、到手香、咖哩草、九層塔、紫蘇葉、迷迭香、薄荷葉、百里香、茴香、辣椒、檸檬薄荷、鼠尾草、時羅、歐芹、沙律生菜、羽衣甘藍。利用營地嘅香草,可以隨意發揮創意同廚藝,炮製一款又一款菜式,享受野炊之樂。

據稱,該營地係由水尾村村民租予幾個年輕人,然後將草地作營地用途。營地內設施齊全,不單有大片真草皮,亦有鋅盆、乾淨洗手間、免費任用嘅雪櫃,浴室更有熱水淋浴設備,衛生情況方面值得一讚。只需帶上基本露營裝備,例如露營帳篷、天幕、露營枱櫈、露營燈、煮食用具、食物、睡袋、吹氣地墊同枕頭等個人用品,即可以到營地露營,非常適合露營新手。

於營地內,可以盡情煮食,BBQ、火鍋、烤雞、焗Pizza等通通都得,大多數食物都可以加入營地自家種植嘅香草,無論係沙律,抑或炮製港女下午茶Tea Set,亦可加入香草作點綴,而Basil羅勒葉則配搭烤焗類型食物最適合。雖然每盆香草只貌似剩低少量,有啲似過份採摘,但場地叔叔稱後面重有新嘅香草,所以數量上暫時不成問題。



延伸閱讀﹕錦田全新營地正對雞公嶺近農莊羊群 實試萬呎草場汽車露營新手體驗

小編講吓嘢﹕

編輯當日親眼見到一個駕駛兩架中港牌車輛嘅家庭組合攜同狗隻入營,剛開始時暗串他人過界,其後自己則完全無視界線,將狗隻放養亂跑,不單走入他人營地範圍,夜晚亦無降低聊天聲量。而且狗隻忽然追住營地內另一家庭嘅一個小女生,女生嚇得拔腿而跑,最終小女生嚇得哭叫,狗隻主人竟然叫女生唔好跑,而非先截停自己嘅寵物,最終更無任何道歉意圖。據場地叔叔所言,好多人攜同寵物入營,但並無陪寵物玩樂,只放養寵物亂跑,甚至吠叫,而狗隻無聊得只於營地內掘窿,始終未知攜同寵物入營所圖為何。編輯本身亦同小女生一樣係怕狗之人,好怕狗隻胡亂奔跑。不過,當日見到攜同狗隻入營嘅家庭將狗隻放養亂走之餘,更令狗隻於營地內亂搵嘢食,編輯雖然驚動物、亦不愛寵物,但亦認為呢種做法並非係愛狗之人,只係將寵物狗當成名牌LV手袋,以為帶出街係好威水、好巴閉。奉勸要去營地嘅人,如果唔係真係會同寵物玩樂,真係唔好攜同寵物進場,既騷擾他人,亦暴露自己低質素嘅一面。


E.A.Tips :

(1) 想知Urban Quit 離。城地址、收費詳情同點去嘅話,Like我哋Facebook 自然會知道啦!(編按﹕寫得呢句就係想大家幫手Like吓我哋Facebook,唔好做CD-ROM啦!)

(2) 呢個元朗錦田收費營地人均收費大小同價,不過三歲以下免費;更改日期需要5個工作天前提出;若當日11:00前出現惡劣天氣,則會獲安排改期。

(3) 每人會劃分200呎空間,以小型雪糕筒劃分;不設探營,每晚18:00營地會關門,直至翌日09:00,期間唔可以出入。

(4) 店方歡迎寵物入場,唔需要收費,不過編輯想講吓記得要睇實寵物安全,避免發生意外,而且唔好放任唔理,場內並唔係閣下獨有,亦唔係個個都鍾意狗隻,如要攜寵物入營,唔好嚇倒或騷擾他人!

(5) 營地內有停車場,唔可以駛入草地範圍,入營車輛必須預先申請;車輛可以直達Urban Quit 離。城門口停車場,需要收費,但留意每車入營時間為14:30至18:00。

(6) 入營時間為14:30,退營時間則為13:00,逢星期一至四均可退營,而加錢可以延遲退營時間至17:00。

(7) 營地設施包含洗手間、熱水淋浴設備、免費雪櫃供冷藏、雪藏食物、洗潔精、廚用鋅盤;但廚餘唔可以倒入鋅盆或馬桶內。不過浴室電熱水爐基本只供應19:00-翌日10:00,而風筒使用時間亦只限09:00至23:00。

(8) 場內有露營裝備出租或購買,包括燒烤爐、炭、燒烤叉、網、支裝飲用水、飲品、杯麵、薯片、Gas、木柴等,出租用品需要俾按金,亦需完整歸還。

(9) 場內更有體驗砍柴活動;更可以免費採摘香草,以各款香草炮製各款菜式都非常適合。

(10) 留意露營地點禁止事項,場內嚴禁使用航拍機,亦唔可以放風箏、踩單車、滑板車、或者任何球類活動。

(11) 除咗揸車或Call車可以抵達,其實亦可以乘搭公共交通工具,於元朗市中心或錦田市中心乘搭小巴路線601/601B,於水尾村村公所、天后廟落車,位置正對錦田平湖,靠近錦田樹屋,只需步行約5分鐘即達營地。

(12) 如要於草地上使用焚火台、爐具,必須加上防火墊。

(13) 每晚23:00後必須降低聲量,唔好騷擾他人。


(14) 露營地點內一邊可望雞公嶺,另一邊就可望到爾巒茵羅洛斯大道,想Chill啲可以盡量面向雞公嶺。


(15) 一般凌晨12點開始可供預約,但事實上會有好多人同時預約,超快會Full Booking,世事未必盡如人意,最好諗定幾個選擇。


(16) 據編輯觀察,從蛛絲馬跡可見,營地為同路人,不過為保護每一間商家,堅持全部都唔會公開理由。


(17) 資料最後更新為2021年4月,最新之收費詳情以營地官方公布為實。


Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


在〈18款香草任摘+可玩柴火! 錦田全新露營地仰望雞公嶺 設備齊全有熱水供應 10分鐘到市中心〉中有 3 則留言

留言功能已關閉。