【2021賞花地圖】近期大熱！5月鳳眼藍季節元朗超大魚塘藍紫色花海限時賞花

[sig_post_pv label=””] 個人瀏覽過

踏入5月，又到咗鳳眼藍開花嘅季節，鳳眼藍更成為近期大熱之花！今年元朗一如以往可見鳳眼藍於魚塘上生長，只要夾啱賞花時間，隨時可以見到一片鳳眼藍花海，加上位置人流唔多，適合拍拖兩個人散步兼賞花打卡。

走入元朗豐樂圍魚塘之前，會經過靠近元朗工業邨嘅盛屋村，亦接近大井圍、吳屋村，附近更有登山小路前往髻山，而沿北面走可見一大片魚塘。其實未有鳳眼藍時，豐樂圍魚塘本身就係一個人跡罕至嘅地方，從魚塘觀望，景觀遼闊，可眺望天水圍，而魚塘內翠綠景色、碧綠湖水一覽無遺，加上蔚藍天空，藍天白雲倒影出現於魚塘內，充滿大自然韻味，尤如置身一幅畫作內，風景更恍若穿越台中近郊地區。

鳳眼藍又稱布袋蓮，亦叫浮水蓮花、豬乸蓮，係一種生長於魚塘嘅植物，於水中漂浮，為漂浮性水生植物，原產自南美洲亞馬遜河流域，舊時新界農民曾以鳳眼藍作養豬飼料。

鳳眼藍一般於5月至10月盛放，花色為藍紫色，花瓣上有黃色斑點，葉子直立，狀似葫蘆，確實有觀賞價值。鳳眼藍生長極快，兩星期即可繁殖一倍，若碰上鳳眼藍花海出現於魚塘之上，則有如置身日本富良野花田。

延伸閱讀﹕1.5小時北區邊境遊！上水賞壯觀鳳眼藍花海穿越兩條河畔步道走訪古洞河上鄉人氣景點大水管/塱原濕地/博文學校打卡【2021賞花地圖】

不過，鳳眼藍嘅出現，其實係會破壞生態嘅物種，其生長迅速，可吸收水中有毒物質，但快速覆蓋水面時，會令其他水中生物、植物死亡，相當具入侵性，對於應否種植鳳眼藍，確實有待商榷。

E.A.Tips :

(1) 由元朗福康街小巴總站乘搭74號路線，10分鐘即達盛屋村總站，沿福順街右邊走，一直向前行就可以步入魚塘範圍，見分岔路口轉右行，左邊為天水圍方向。

(2) 走入魚塘範圍大概只係1.5至2公里，大概10至15分鐘，沿路會一直斷斷續續見到鳳眼藍。

(3) 基本上鳳眼藍只係得一日花期，每日都會開花，快速開花同時快速凋謝，但有陽光時又會再生長。

(4) 走入魚塘必須走車路，不時會有車輛駛過，要小心安全。

(5) 魚塘路段比較多碎石，而且比較狹窄，要注意並非完全平坦，小心唔好跌落水，亦唔好令其他人跌落水。

(6) 魚塘內無遮無掩，陽光非常猛烈，要注意做足防曬揩施。

(7) 勿丟石仔到魚塘內，記得自己垃圾自己帶走，亦要保持安靜，勿騷擾附近村民；另賞花記得眼看手勿動，唔好採摘花卉。

(8) 朝早賞鳳眼藍會比較好，皆因陽光充足，剛剛開花；而黃昏時份則幾近枯萎，數目較少，但就可以同時於魚塘內睇埋夕陽。