[sig_post_pv label=””] 個人瀏覽過
壽司郎於香港接連開分店，插旗港九新界，但目前無得電話預訂，想食平價壽司都唔容易，只能夠搵街坊小店。九龍灣一個商場內就隱藏一間平價壽司店，每件壽司低至$3起，最常見嘅三文魚壽司亦只係$4/件，更有低價魚生飯同熟食，拍拖兩個人想行經濟路線都好適合。
漁八壽司位於麗晶商場內
位於九龍灣麗晶商場嘅漁八•壽司，靠近扶手電梯，唔太起眼，但原來係一間質素唔錯又平價嗁壽司店。小店主要做外賣生意，大部份位置都用作廚房，只有門口兩三個堂食座位。從門口菜單中可見，魚生飯最平$34，亦有多款壽司拼盤可擇，亦有熟食，平均$42就有一碗飯，蒲燒鰻魚飯只係$52。
有少量座位
今次記者叫咗26件壽司，包含玉子$3、腐皮$3、三文魚$4、𩶘魚$4、希靈魚$6、吞拿魚$8、帶子$8、油甘魚$12、海膽帶子$18，百五蚊左右有交易。每件壽司價錢都公道，刺身幾新鮮，飯粒比較黏，大多係搓成偏圓狀，而非平常坊間嘅長形大舊飯狀態。
一盤兩個人食嘅壽司大約只係$150 三文魚壽司 油甘魚壽司 海膽帶子壽司 吞拿魚壽司 𩶘魚壽司
基本壽司平均價錢較坊間平，但唔會切得太薄，又或太細件，魚刺身幾肥美，而且款式眾多。海膽亦夠新鮮，無腥味，有甘甜味，帶子亦夠爽口鮮甜。平嘢未必一定無好嘢，爭在你識唔識揀。
壽司蛋糕僅為編輯自己隨手砌成，並非小店出產之物
E.A.Tips﹕
(1) 外賣只需從門口外賣紙劃上幾筆，交俾負責人就可以，一般等待15分鐘左右，視乎當時訂單幾多。
(2) 滿$400有送貨服務，免運費，但只限九龍區。
(3) Whatsapp可以叫定外賣，自取或送貨都有得揀。
漁八•壽司
九龍灣宏光道80號麗晶商場地下6號鋪
12:00 – 22:30 
5703 2573
