海南雞2.0

大角嘴街坊海南雞秘店 低調泰式雞飯2個版本4種口味

[sig_post_pv label=””] 個人瀏覽過





唔少香港人都喜愛食海南雞飯,而眾所周知海南雞飯係東南亞菜式,一般來自新加坡、馬來西亞、泰國、印尼等地,比較突出嘅係星馬式海南雞飯同泰式海南雞飯。今次發現大角嘴一間比較鮮為人知嘅海南雞專門店,比較低調,只係由同路人加持,小店就以泰式海南雞飯為主打,雞飯甚有水準,而且經濟實惠,拍拖兩個人隨時$100有找!

小店以泰式海南雞飯為主,當中招牌無骨海南雞飯分成輕量版$48、豪華版$60 之餘,重有薑蔥、麻辣、香辣口水雞口味,亦可以自由選擇黃油飯或白飯,豪華版份量大概有10件雞肉,上層雞肉來自髀肉,而下層雞肉則來自胸肉,雞髀肉固然滑嫩,估唔到雞胸肉都軟腍唔嚡口。

至於醬汁亦同平常泰式雞飯一樣,有兩款雞飯醬作沾醬,入口同一般泰式雞飯醬汁相近,一種醬汁以醬油膏、泰式醬油、椰子糖製,味帶鹹味,另一種則以大蒜、生薑、芫荽等製,味帶微辣,水準不俗。而黃油飯雖然充足,而且色調鮮黃,男仔絕對飽肚,而女仔未必食得完,但飯底比較淡身,略嫌油香不足。

泰式豬頸肉飯$50 同樣有厚厚白飯底,米飯較黏,唔太乾爽,但豬頸肉唔係薄切,燒得香口,有焦香而無燶邊,外皮略有輕脆感,肉質腍身,配搭泰式辣醬後,辛辣中帶香甜味,更香口。

每一盒飯都會配上一碗例湯,同樣為雞湯,湯內多芫荽,雖然比較多油,但就香味十足,油膩唔等於唔好味。




E.A.Tips﹕

(1) 小店位於茶星人x御守壽司斜對面,位置靠近香港管理專業協會李國寶中學,離奧海城僅5分鐘步程。

(2) 無堂食,只有外賣服務。

(3) 留意雞飯有4款口味,任君選擇。


海南雞2.0

大角咀海庭道

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


在〈大角嘴街坊海南雞秘店 低調泰式雞飯2個版本4種口味〉中有 1 則留言

  1. 自動引用通知: 【區區有💛】大角嘴5間海南雞專門店 邊間$43平絕全區? – eatwo 兩個人醫吓肚

留言功能已關閉。