[sig_post_pv label=””] 個人瀏覽過
中秋來臨，當然要賞吓月、玩吓燈籠啦，唔少人都瘋狂搵定中秋燈籠打卡位，講到燈籠，銅鑼灣咪有一間燈籠滷味可以去囉！上年2月由台北登陸香港銅鑼灣嘅燈籠滷味，開業後經常大排長龍，每次經過都會見到人流幾乎未曾減退過，呢間主打台式滷味嘅小店，可謂登龍街人氣之選，今年更推出銅鑼灣店限定嘅「抗疫二人套餐」，包含地道滷味小食，適合拍拖兩個人去食，順道感受返久違嘅夜市風味。
有20年老字號嘅燈籠滷味為台北過江龍，室內裝潢擺設以復古設計，充滿懷舊感，台灣相片加上台灣歌曲，品嚐正宗台灣滷味，有一秒穿越台北感覺，甚有心思。小店於師大夜市被封為「北市第一加熱滷味」，各款滷味似足港式車仔麵，既有套餐，亦可以自由配搭，採用台灣總店滷汁，加上等桂皮、花椒、甘草等幾十種藥材，再以慢火熬煮，上枱暖笠笠，滲出些微藥膳香，但藥材味本身唔重，鮮甜之餘帶有回甘味，啖啖台北味道。
最近銅鑼灣店推出店舖限定嘅抗疫二人套餐$178，包含招牌燈籠滷味、台灣小食、手搖飲料，30款滷味當中唔少都係台灣直送，今次套餐已被挑選幾款配料，有蹄膀、豬耳朵、甜不辣、麻吉燒、百頁豆腐、白蘿蔔、空心菜、杏飽菇，件件有份量，滷得入味。當中爽脆豬耳朵既有咬口，亦係最入味嘅配料，而甜不辣、麻吉燒夠煙韌彈牙，滑溜嘅百頁豆腐、軟嫩嘅白蘿蔔、爽脆嘅空心菜都吸收滷汁，其他配料同樣帶有濃香滷汁味。另外可配搭稻庭烏龍麵、王子麵、冬粉、油麵、米線、出前一丁，烏龍麵順滑彈牙，滷上後亦嗦晒湯汁精華，感覺原汁原味。
小食包括Shake Shake海苔鹽酥雞，配上紙袋自己Shake，紙袋盛載鹽酥雞的確好有夜市風味，加入海苔少後，將紙袋搖勻，每粒鹽酥雞粒混有海苔粉後，滿滿酥香、鹹香味，啖啖脆卜卜，唔太油膩同厚粉，雞肉嫩滑，好香口，若鎖緊肉汁會更好。小食亦同時有採用台灣米嘅燈籠古早滷肉飯，細細碗，但滷肉舖滿白飯表面，比台灣當地滷肉飯較遜色，欠缺熱度，但入口偏軟，總算不過不失。而手搖飲料有7款，當中有茉香綠茶、古早冬瓜茶等，有茶香，幾清新同解渴，甜味唔算太重，並非死甜味。
E.A.Tips﹕
(1) 週末會大排長龍，最好避開週末兼食飯時間，下晝當下午茶會比較容易有位，而最後落單時間為21:30。
(2) 銅鑼灣登龍街店為首店，旺角朗豪坊亦有分店。
(3) 手搖飲料加珍珠或仙草各需另加$5。
(4) 雖然有外賣自取服務，但最好都係揀堂食，因為本身都只係溫暖狀態，滷味外賣返屋企可能會變得凍冰冰。
(5) 堂食免加一服務費，只係每人最低消費為$30。
燈籠滷味
銅鑼灣登龍街39號地下 
12:00 – 22:00 
2581 2223
