丼一日式燒肉丼 (大全街)

大角嘴全新日式燒肉丼飯 兩人最平$99埋單!

[sig_post_pv label=””] 個人瀏覽過





入大角嘴搵食,不時有驚喜,區內大部份都係小店,良心滿佈地圖,最近又有一間新店開業,價錢實惠,以招牌日式牛肉飯為主打,外賣更抵食,拍拖兩個人一齊去食可以唔使$100埋單!

「丼一日式燒肉丼」命名嘅小店,模仿日式小店設計,乾淨企理,炮製燒牛肉飯等日式美食。係咪平嘢無好嘢?今次即管試吓$100內埋單又會唔會中伏啦!

一份抗疫二人餐盛惠$99,可以任揀2款飯、拉麵或烏冬,同時附送飲品,而且可以選特飲,如荔枝梳打、香檳葡萄梳打,冰爽清涼,適合熱辣辣、汗如雨下嘅夏天飲用,荔枝味比較突出,葡萄味較淡,甜度唔算太高。



首選一定係燒牛肉飯,今次揀芝士燒牛肉飯$56,賣相唔錯,長形外賣盒盛載白飯,除咗飯形固定咗,一片片牛肉質素不俗,香氣四溢,牛肉表面舖有芝士,燒過後亦保留肉汁,有油香,唔乾身,牛肉片夾離燒汁味、芝士香,火炙芝士味濃郁得帶邪惡感。

蕃茄芝士海鮮烏冬$62 湯底濃郁,蕃茄湯呻入口鹹度較重,但同烏冬撈勻後,味道又比較淡,而外賣芝士未能完全溶化,若溶於湯內會更惹味。而海鮮則有大隻青口、蝦肉、蜆肉、帶子等,份量適中,烏冬麵條則不過不失。


E.A.Tips﹕

(1) 丼一日式燒肉丼同時有3間新店,大角嘴店靠近大全街,荃灣店位卡千色匯2期,而葵涌店則鄰近和宜合道。

(2) 抗疫二人餐只限外賣自取,可以預先打電話落單。

(3) 位置於大全街,隔離係麥金.麥金特色馬拉茶啡室


(4) 餐廳無加一服務費。

(5) 燒牛肉飯其實有3款唔同口味,包括原味、辣味、芝士火炙口味。


丼一日式燒肉丼

大角嘴大全街6-20號大富樓地下A2A號舖
11:30 – 22:00
5588 8182

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


在〈大角嘴全新日式燒肉丼飯 兩人最平$99埋單!〉中有 1 則留言

留言功能已關閉。