ATMA

必試燒腩仔Bagel!上水圍村精品咖啡店ATMA避世 週末歎咖啡感受悠閒氣氛

[sig_post_pv label=””] 個人瀏覽過





匿藏於上水圍村內嘅咖啡店,由村屋改建,以上居下舖形式自居,地下連花園為咖啡店同市集,上層則為半開放式空間,不時作為工作坊或放映會嘅共享空間,拍拖去歎杯咖啡幾Chill,有遠離繁囂避世之感。

以ATMA命名嘅咖啡店,據悉有呼吸、靈魂意思,其實係一間上水村屋,步上樓梯即見小店,花園放置咗幾張茶座枱櫈,更種有唔少細小盆栽,有幾分歐陸風格,氣氛悠閒,田園風嘅環境一流,若氣溫唔高嘅情況下,必選室外座位。門口右邊會見到一個寫有「清雲門」嘅牌匾,佛系味道甚濃。

走入室內空間前,會見到門口旁邊有一個小型市集,售賣唔少精緻小手作,如手作皂、陶瓷器皿等。門口寫住「入店前,請先將煩惱放於門外。」可以放鬆感受吓寧靜空間,室內更有唔少Elements,一隅有書櫃,另一邊更有巨型求籤筒,甚至占卦,將玄學、心靈同咖啡融合,有興趣不妨睇睇。

店內以手沖咖啡、Cold Brew等咖啡為主,亦有烘焙蛋糕、Bagel等輕食,款式不時會轉換,編輯曾於其聯乘店舖品嚐過ATMA嘅蛋糕,精緻之餘亦質感軟綿,甜度唔高。咖啡即叫即沖,當中有一款手沖咖啡叫「猜猜我是誰」,價值$50,會有3杯60ml嘅咖啡,可以玩吓遊戲,估吓每一杯嘅咖啡豆屬於邊個產區,而每星期都會更換一次咖啡豆款,有趣非常。

延伸閱讀﹕清一色現泡茶 唔賣咖啡! 觀塘廠遊迷你日系茶室 週末與情人榻榻米放空茗茶

Coffee Tonic $45 係將Tonic Water同咖啡分開上枱,將已經調校好嘅咖啡自行倒入Tonic Water入,色調逐漸變啡,玩味甚濃。Tonic Water內有檸檬片,似檸檬味嘅咖啡,Tonic Water同檸檬微酸味中和咗咖啡苦溺味,夏天的確幾清爽。



而小店基本有6款精品咖啡,每杯價錢由$60至$75,其中一款係Kenya$65/杯,由Kirinyaga Gakuyuini種植,為水洗咖啡豆,味道含莓果、蜜餞味,啖啖有微微果酸味,苦澀味比Coffee Tonic重,一杯精品咖啡其實都唔小,咖啡暖笠笠,趁熱飲會更好。

貝果貌似自家製,尤其是十字肉柱貝果拼提子乾奶醬油貝果$45,貝果表面劃有十字記認,內餡簡單,似平時提子乾配Cream Cheese,但比Cream Cheese無咁膩。貝果略有煙韌,不過不失,感覺蛋糕比貝果更出色。

芥末燒腩仔洋蔥京蔥貝果$55 內餡則較為特別同罕見,將兩、三件燒腩仔肉放入貝果內,加上芥末調味,似足食燒腩仔飯,加入洋蔥、京蔥、生菜點綴,可中和豬肉肥膩感。


E.A.Tips﹕

(1) 從馬會道、寶石湖路交界步行到店舖,約10至15分鐘腳程,需要穿過村屋、上水廖萬石堂,過咗中心村再過馬路就會見到,喺樓梯上面,若上水市中心行過去就比較遠,要30分鐘步程。

(2) 小店目前仍然維持二人一枱,17:30會Last Order。

(3) 揸車去可以於文閣村錶位停車場泊車。

(4) 巴士路線70K,79K,270S,277E, 277P,N373,T277 皆可到達翠麗花園,折返迴旋處方向過斜對面就可穿過堆村屋;而巴士路線73K更方便,於鳯溪第一中學落車,步行時間快5分鐘。

(5) 經過村屋時謹記保持安靜,唔好騷擾居民。

(6) 室內為冷氣間,亦有分小房間、大廳位;而戶外位則比較熱,最多得大風扇,只係影相會比較靚。

(7) 位於上水嘅咖啡店ATMA與觀塘一間茶室想爺爺了聯乘,ATMA嘅蛋糕會同時於想爺爺了提供,完美演繹良心經濟圈運作。


(8) 蛋糕有時候只提供週末,需要留意官方Facebook公佈。

(9) 小店內有手沖咖啡體驗,不過一般平日只做街坊生意,謹記要去前往小店網站預約


(10) 週末假期會比較多人,食物可能需要等比較長時間。


ATMA

上水上水圍文閣村46號地下
星期一全日休息;星期二至日 12:00 – 20:00
6698 2085

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!