【區區有小店】油塘美食沙漠中搵食 僅限3間連鎖式小店

[sig_post_pv label=””] 個人瀏覽過

 

 

 

 

走入油塘,大概會知道咩叫「真.美食沙漠」,全區良心店3隻手指數得曬,而油塘區內嘅3間同路人小店,都係連鎖式嚟,即係其他區域皆有分店,可見油塘係零獨特食店,如果拍拖兩個人行過,只能於有限餐廳中搵食啦!

(1)和平飯店

以點心菜式為主嘅和平飯店,裝潢亦貫徹中式古典風設計,空間感係3間當中最寬廣,而每個座位亦好有私隱度,尤其係窗邊座位,職員會將簾拉低,唔需要望住外面其他客人用餐,方便「飲啖茶、食個包」,每位茶介$9,重有加一,只係加茶水比較需要時間。而菜式以上海美食為主,韭菜鮮肉鍋貼每3隻$32,上枱時仍然暖身,表皮比較厚實,煎成焦黃,入口香脆,但油份較多,餡料適中;而不等你小籠包每4隻$35,上枱完全係熱焫焫,表皮較薄身,比鍋貼餃板柔軟,餡料豐富,豬肉丸有鹹香,蘸上黑醋帶出鮮甜味,清清哋,略嫌湯汁唔夠多。至於另一碟雪菜鹹肉炒年糕$68,價錢雖然偏貴,但份量適中,年糕煙韌,味道唔太鹹;而排骨擔擔麵$56 麵底不過不失,湯底花生香唔夠重,排骨稍有香脆,肉質鬆軟,只係唔夠肉地。

和平飯店

油塘高超道38號大本型2樓237號舖
11:00 – 16:00;18:00 – 23:00
2568 3708

(2)北海道牧場

而粉藍、白色為主調嘅北海道牧場雖然睇落好似日本餐,但其實係一間港式快餐連鎖店,價錢比較貼地,早餐到12點就截單。豬柳漢堡拼3.6牛乳炒蛋配熱香餅$36 似足快餐店麥當勞,不過不失,除咗片牛油質感有啲奇怪,其他材料都已經比麥記好。雖然熱香餅唔夠鬆軟,但牛奶炒蛋就幾滑溜,豬柳、漢堡亦唔係麥記咁乾柴。迷你火腿通粉加$8,為一個飯碗Size,不過不失,至於熱奶茶亦唔太突出,整體最大特色係夠平。

北海道牧場

油塘高超道38號大本型LG2樓202-203號舖
星期一至五 08:00 – 21:00;星期六至日 08:00 – 22:00
2793 0326

(3)Antoshimo Cafe & Bakery

而Antoshimo Cafe & Bakery就真係日本嘢,午餐、下午茶、晚餐都有套餐,價錢適中,相對上述兩間係比較中價位,大多數套餐都預一個人食,但有部份套餐可以兩個人一齊食。午餐一份set大概$78,可以揀主食、小食、甜品、飲品,自選鍋物都係原鍋上,有熱烏冬或燴飯,全部可以自由配搭。而下午茶就比較平,比如壽喜燒湯鍋烏冬鍋配小食洋蔥圈$58,牛肉份量唔少,只係稍有嚡口,烏冬麵質為稻庭烏冬,質感唔差,加上日式醬油甜湯底,配有配菜,如鳴門卷、海帶、粟米,份量適中。至於洋蔥圈則炸成金黃色,外脆內軟,每客有4件,小食反而唔錯。另外,小店以沖繩名物為主打,飲品有黑糖系列,甜品必食嘅一定係招牌冬甩,當中有沖繩花之雪糕冬甩$43,所有冬甩都係即叫即焗,熱焫焫嘅麻糬冬甩配上凍冰冰嘅雲呢嗱雪糕,冰火口感別有一番滋味。冬甩有啖啖煙韌感,幾鬆軟,上面有Custard,下面有唔算濃味嘅焦糖醬,頂端更有士多啤梨絲點綴,無乜甜膩感覺。

Antoshimo Cafe & Bakery

油塘高超道38號大本型2樓211號舖
12:00 – 21:30
2577 6685</p>



Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


在〈【區區有小店】油塘美食沙漠中搵食 僅限3間連鎖式小店〉中有 1 則留言

留言功能已關閉。