[sig_post_pv label=””] 個人瀏覽過
上環嘅步調向來令人感覺悠閒，同中環急速步伐有天壤之別，令上環隱藏好多間慢活咖啡店，當中就有一間炮製日式家庭料理嘅小店，包括日式定食、富士山御結，主打嘅重有手沖咖啡，每份料理、每壺咖啡都令人感受一份心思，用心製作嘅餐點的確係感受得到，值得拍拖兩個人去歎杯咖啡。
咖啡店店名黃得明顯，將抗爭口號融合，亦將抗爭事件融入餐牌，但位置非常隱蔽，舊樓地庫實在難以找到。小店其實分成兩個門口，一個門口可從大街向下行，另一個門口則需要穿過狹隘小巷，而巷弄門口更有大型本土塗鴉壁畫可以打卡，畫上可愛卡通同咖啡飯糰。
步入門口，會見到外面牆身以灰調水泥風設計，非常簡潔，再拉開趟門，會發覺室內環境比較昏暗，牆身上有一面酒櫃，但吧枱則有咖啡壺、咖啡杯，貌似朝啡晚酒嘅小店。
日式一汁三菜定食有4款，當中吉列大蝦定食$120 包含珍寶吉列蝦配蝴蝶蝦、日式汁燒豚肉、櫻花蝦紫菜拌飯、豆腐海帶味噌湯、蒜味螺肉或芝麻八爪魚。前菜螺肉鮮甜醒胃，大蝦炸得香脆可口，但略嫌炸漿稍厚，而薄切豚肉雖然唔太軟腍，但醬汁搭夠，濃而不膩。味噌湯除咗海帶豆腐，亦有蒟蒻，入口較清，即使係紫菜拌飯都唔簡單，以海量紫菜碎同櫻花蝦同米飯混合，配上汁燒豚肉醬汁更香口。
最吸睛食物莫過於開業後大受歡迎嘅富士山御結，每雙$60，有兩種顏色，以富士山為藍本嘅飯糰造型精緻，每份皆用人手搓揉而成，即叫即製，上枱時每粒飯粒仍然暖笠笠，飯粒為日本米，微黏而有咬口。編輯當日有2款顏色嘅富士山御結，包含代表櫻花粉嘅肉鬆沙律、代表寶石藍嘅蟹肉蟹籽，肉鬆沙律餡料內有款醬汁鹹中帶甜，比較濃味，有濕潤感，而蟹肉蟹籽則剛好相反，比較清淡同鮮味，較為乾爽。
最特別之處係有精品手沖咖啡體驗，小店有20種咖啡豆，會即場按客人口味挑選合適嘅咖啡豆，價錢由$80至$150不等，咖啡師睇落的確係幾專業，睇得出係對咖啡好有興趣深入研究嘅年輕人，不時慷慨提供咖啡知識，教路點分辨咖啡嘅甜、酸味，將咖啡粉搖一搖又變成另一種味道。編輯實試一壺手沖咖啡$120，發覺咖啡師極細心去了解客人口味，再為客人推介邊款咖啡豆。
咖啡師為編輯推介咗一款來自2020年最佳巴拿馬精品咖啡拍賣會（Best of Panama(BOP) 2020 Auction Lot PAC-02 Edition XXIV 2020）嘅得獎咖啡豆，名稱為Damarli Noble Pacamara，非常特別，似乎係一種充滿貴氣嘅咖啡豆，下面寫明浸漬法發酵，咖啡粉聞落有果香味，但香味比較薄弱。
咖啡沖泡後其實驚喜不大，但似乎幾有深度，咖啡味道餘韻悠長，絕對要慢慢感受，咖啡並非花香味，而係果香味，係暗地裏逐漸散發嘅香味。呢種咖啡豆比平常嘅咖啡容易入口，無烘焙苦味，甜度亦唔高，反而似飲杯茶，只有啖啖夾雜咖啡酸味同果香味。
據咖啡師所言，咖啡嘅果香味來自烏梅、櫻桃等，味道夾雜蘋果酒、冧酒、brandy chocolate、黑糖、可可味，有少少果酸味。咖啡等待放涼後，果酸味比較突出，同前段味道稍有分別，咖啡味平衡到酸甜味。咖啡質感比平常滑順，仍然係覺得茶感比較重，似足飲杯茶，好少可飲完咖啡係唔會覺得口渴。
E.A.Tips﹕
(1) 小店有兩個入口，第一個入口以文武廟為起點，於荷李活道轉入平安里，小路比較隱蔽，最好有多個朋友陪同，直上樓梯頂後，小路口位於人嘅左後面，切入小路後向前走就會見到門口，盡頭亦只係轉返出必列者士街；另一個入口就比較安全，位於必列者士街，對面係雍翠臺2座，相對第一個入口會比較容易搵到。
(2) 星期日無主食，只有輕食。
(3) 手沖咖啡價錢只標示每壺$80至$150，只根據合適個人口味嘅咖啡豆而訂價。
(4) 小店有室外、室內座位，室內比較昏暗，普通座位比較舒服，而吧枱座位就可以清晰望到咖啡師沖咖啡，室外就比較光亮。一般會分為用餐座位同飲咖啡座位，但兩樣都品嚐就兩邊都可以坐。
(5) 食物雖然偏貴，但咖啡就的確物有所值。
(6) 富士山御結為人手即場製作，每份需時約20分鐘，而且星期六、日先有，有4款口味，每款口味1款顏色，包括代表櫻花粉嘅肉鬆沙律、代表寶石藍嘅蟹肉蟹籽、代表芥末黃嘅紫薯粟米、代表丁香紫嘅紫蘇豚肉，重有代表翡翠綠嘅芫荽滑蛋，而翡翠綠為期間限定，當日有邊款就有留意返官方IG介紹或預先詢問吓啦。
(7) 定食有4款，包含日式鯖魚定食、吉列大蝦定食、吉列豬扒定食、日式素菜定食；亦有各款炸物小食、蛋糕、雪葩可擇，蛋糕就星期五、六、日先有。
(8) 多人嘅話用餐時間會限時一小時。
Not One Less Coffee 願榮光咖啡館
上環必列者士街31號地庫 
11:00 – 18:00 
6843 6772
在〈N.O.L.！咖啡度身訂造！上環半山巷弄高水準手沖咖啡館 日式一汁三食定食+富士山御結極精緻〉中有 1 則留言
留言功能已關閉。