[sig_post_pv label=””] 個人瀏覽過
龍虎山靠近西高山、太平山,係其中一個行山點,相對其他行山路線,路段樹蔭較多,即使係走上松林炮台或山頂都唔困難,但對於夏天香汗淋漓又想兩個人拍拖去郊野地方嘅朋友,編輯推介呢條滿佈樹蔭又全為麻石路、水泥路嘅路線,既可於白色小屋打卡,觀望瀑布景觀,亦可於30分鐘步程可以走完全程。
由旭龢道大學堂起步,會首先抵達旭龢道食水配水庫,前身係西環濾水廠,雖然門口被上鎖,但其實係全港第一個食水配水庫,配水庫樓下就係香港大學。從門口觀望,配水庫內有樓梯可拾級而上,可見頂端為一塊大草地,不過就未有改建為配水庫遊樂場,公眾係禁止進入。
該配水庫工人宿舍被改為龍虎山環境教育中心,位處港大後山,有過百年歷史,被列為香港一級歷史建築,而中心內更特別保留舊式磚牆、壁爐。中心以純白為主調,白色小屋古色古香,簡潔亮麗,可以打卡,中心門口更有一個小型生態花園,有各種淡水魚、植身等。
中心由香港政府環境保護署、香港大學合作建立而成,透過中心展覽介紹,從而學習自然生態物種、文物建築環境,了解氣候影響各種大自然生態,加強大家對低碳生活認知。
而後門有一道小路可以直通龍虎山郊野公園,而今次編輯向另一個方向走,經碧珊徑走向龍虎山瀑布,沿山腰散散步,毋須汗流浹背,最後於薄扶林道落山。
碧珊徑係一道以麻石舖砌嘅小山徑,為一道薄扶林輸水管道,用作隱藏水管溝槽,水管通道連接薄扶林水塘、舊薄扶林濾水池,有近150年歷史。碧珊徑引水道路段平坦易行,沿途有足夠休憩設施,中段會見到指向龍虎山郊野公園等指示牌,但無需理會,只需靠右行,沿碧珊徑一直向前走。
穿過幾條麻石拱橋,唯獨中段可切入一道小山路,通往龍虎山瀑布,由西陲碧珊徑走,瀑布位處碧珊徑北面,瀑布路段只係一條澗道,並唔複雜。不過,龍虎山瀑布無一瀉而下嘅壯觀感,要喺雨後多水嘅情況,瀑壁先會有瀑布景象,有時候水流係不足以構成瀑布,水流不足時比較似一個澗谷,但石澗流水潺潺,淙淙流水聲帶有清涼感,風景仍然不俗。
從瀑布折返,繼續活碧珊徑走,右邊薄扶林道已逐漸清晰可見,終點亦近在咫尺,只需再走10分鐘就可以於薄扶林道離開。小橋流水,綠樹成蔭,生態物種豐富,碧珊徑就有如港大後花園。
E.A.Tips :
(1) 乘搭巴士路線13, 3, 45A, 45S, 970可以到達旭龢道嘅旭龢道食水配水庫;乘搭巴士路線巴士: 3, 3A, 45S, 970, 970X, 973可以去到香港大學,步行可以直上龍虎山環境教育中心;
(2) 旭龢道食水配水庫為禁止進入地方,而步行3分鐘即可以到達免費入場嘅龍虎山環境教育中心,更有導賞服務,詳情請參閱官方網站,不過無預約嘅話,職員有時間都會好詳細地講解各種生態物種。
(3) 乘搭巴士路線23, 31, 4X, 970, 970X, 973可以去到中西區碧珊徑 Pik Shan Path、龍虎山瀑布山腳。
(4) 可以由西營盤步行上旭龢道,然後穿過龍虎山環境教育中心,經碧珊徑前往龍虎山瀑布,再由近瑪麗醫院山腳離開,全程多樹蔭,路段輕鬆。
(5) 落雨時謹記唔好上山啦,出發前最好預先留意天氣報告。
(6) 愛護郊野地方,謹記自己垃圾自己帶走。
(7) 雖然走碧珊徑毫不困難,但小徑曾經重修,都要慎防山洪,而山徑由石塊砌成,天雨路滑都要小心安全。
旭龢道食水配水庫
香港島西區旭龢道50號
龍虎山環境教育中心
旭龢道50號
10:30–17:30,星期一全日休息、星期三下午休息
2975 9031
碧珊徑 Pik Shan Path
中西區
24hours
龍虎山瀑布
龍虎山薄扶林道92號
24hours