深水埗異國風Tapchan大毛毯進餐實試土耳其知名甜品+伊朗青檸玫瑰水

[sig_post_pv label=””] 個人瀏覽過

深水埗食店多多，要突圍而出並非易事，區內就有一間開業約一個月嘅新店，離黃金電腦商場只係1至2分鐘步程，整個空間以土耳其風格為主，充滿異國風情，滲透出少少中亞、中東Style，拍拖兩個人去食吓飯、打吓卡，最近全港仍被疫情陰霾籬罩，尚且有輕微偽旅行感覺，可望梅止渴。

步入大門口，即被三張超大嘅Tapchan上嘅大毛毯吸引，牆上更可見世界地圖，但三張皆Full Booking就只能於無人嘅時候先打卡。Tapchan其實係中亞人嘅傢俱，唔少人都會喺Tapchan上食水煙同閒聊。整個空間只係簡單大床上披上毛毯，霎時有濃厚異國感，加上前面有印度風格小木門，地上有阿富汗風格地毯，直行到尾亦有摩洛哥風格馬賽克吊燈，連進餐碗碟都有民族風格，異國風滿滿，女仔就係比較容易受到吸引。

餐廳以「Lovely Paisley」命名，據悉由幾位喜愛旅行嘅Backpacker組合而成，而「Paisley」為一種相當受歡迎嘅中東、印度花紋圖案，以曲線、圓點結合，狀似水滴、腰果花，用色搶眼，帶有華麗感覺之餘，亦有神秘色彩，同時似足印度教中嘅「生命之樹」內嘅菩提樹葉或海棗樹葉。

店內主打多國菜，但菜式上偏向土耳其菜、中亞菜，甚至東歐菜，部份菜式感覺有幾分似Fusion菜。當中，小食如土耳其芝士春卷$58/3件脆感唔太大，未夠脆口，而芝士相對一般芝士無咁濃郁，只係滲出微微芝士香味，唔算邪惡。另一道小食為印度脆球配海蝦冬蔭公$88，改良當地街頭小食，脆球上放有橙紅蝦肉，取代薯仔、洋蔥，旁邊有一小碗泰國冬蔭公湯汁，質感稀身，倒於脆球內，入口有辛辣味，但無乜冬蔭公味道，比較遜色。主菜比較有特色嘅係格魯吉亞蒜香牛油雞排、阿根廷紅蝦香辣青醬海鮮扁意粉，重有本地手工煙燻啤酒煮牛肋條燴飯$168，份量唔多，飯粒比較硬身，貌似以意式燴飯配搭牛肋條碎肉，入口唔算暖笠笠，稍有煙燻味，不過不失。

土耳其開心果千層酥$58 甚精緻，係為土耳其出名嘅甜品，即Baklava，以酥脆薄皮混合開心果、糖、無鹽奶油，綠皮表面透光，層層堆疊，感覺有層次感。今次千層酥表面淋上糖水，入口貫徹土耳其甜品甜到漏嘅口感，中央亦有開心果顆粒，但欠缺千層酥烘烤後嘅酥脆感，質感比較軟腍。

飲品當中固然有土耳其茶，亦有唔少Cocktail、Mocktail特飲，包括以無酒精嘅Blue Lagoon $58、來自伊朗嘅Tokhm-E Sharbati $58，Blue Lagoon之名來自冰島溫泉，以藍柑橘酒混合Lemonade、西柚汁、檸檬汁、冰粒，再於杯緣撒上糖霜，絕對IG-able，西柚酸味濃郁；而Tokhm-E Sharbati 就係印度傳統飲品，以青檸混合玫瑰水，加入奇亞籽薄荷葉，花香味重。兩者同樣酸中帶甜，略帶清爽感，相當醒胃，亦可消滯。而Lemon Coffee $48 望落比較沉悶，無乜太大特色，檸檬、咖啡味適中，但咖啡味比較厚實，質感順口，帶有清爽酸甜味，似乎飲品比食物水準稍為穩定，亦可解暑。

E.A.Tips﹕

(1) 乘搭巴士路線171A, 171P, 37, 905, 970, 970X 可來往佐敦道至屯門、元朗方向到達深水埗。

(2) 絕對需要Book位，尤其係土耳其大毛毯風格餐枱，亦可以等待未有人時，或者食完嘢臨收舖兼離開前先去打卡。

(3) 位置於麥當勞斜對面，非常易搵。

(4) 大毛毯位置雖然影相一流，但進食會比較辛苦，如果食嘢就最好坐返正常座位。

(5) 店內有一款飲品同本地社企好夠薑聯乘。

(6) 餐廳自介上寫有係一間推出異國菜嘅咖啡館、小酒館，意式咖啡豆為巴拿馬單品日曬，而手沖咖啡豆則為自家烘培；葡萄酒則挑選比較少見嘅來源，如敘利亞、土耳其、黎巴嫩、格魯吉亞、以色列。

(7) 大門口旁邊有唔少旅遊書，可以借閱。