大角嘴限定店！超抵食外賣壽司便當連本土御守賣相精緻盒盒IG-able

[sig_post_pv label=””] 個人瀏覽過

日本新幹線外賣便當向來賣相精美，而香港製造嘅日式便當大多欠缺日本便當嘅美觀度，不過大角嘴就有一間開業半年嘅外賣壽司店，以日式便當丼飯為主打，盒盒超精緻，重點係價錢親民，拍拖兩個人食吓經濟飯之餘，亦可以打卡！

離奧海城不足5分鐘步程嘅「御守壽司」，同茶飲店茶星人共用一間店舖，壽司店係茶星人大角嘴店嘅限定店，款式都係外賣日式便當、丼飯、壽司、手卷，包括各款魚生飯。御守壽司最特別之處係賣相精美，每盒都IG-able，而日本人嘅「御守」即日本神舍求返嚟嘅護身符，而小店將「御守」兩個字則印於便當盒上，加上可愛貓咪造型嘅「御守」形小紙袋裝有筷子、小碟、豉油、Wasabi，全套有如為本地人特製嘅護身符。

每個便當飯盒都充滿心思，方方正正，以薄製木板砌成便當外圍，精美之餘亦可保溫，Size亦一致，有逾10款選擇，當中四彩魚生飯$80 包含三文魚、吞拿魚、魷魚、希靈魚、赤蝦、帶子，魚生份量適中，並非薄如紙張，赤蝦、帶子夠鮮甜，魷魚亦彈牙，吞拿魚軟腍新鮮，希靈魚無魚腥味，三文魚夠肥美，確實難以搵位批評，唯一批評就係醬油、Wasabi並非日本製造。香港地食魚生外賣一般都係雪藏貨，但點將魚生刺身解凍都係技巧，同時要保持鮮美，從呢個層面可以知道師傅對待食材嘅認真。

臨近夏天當然有夏日之選，冰爽選擇有三文魚親子飯$65，價錢親民，三文魚子舖滿米飯表面，加上肥美厚切三文魚，魚脂豐富而唔油膩，入口甘香，將米飯同配料撈勻已經滿足。而每盒便當都有3款前菜，包含螺肉、中華沙律、粟米，估唔到前菜都睇到係有心思，而米飯亦非普通貨色，將壽司醋、米飯混合，壽司醋均勻散佈米飯當中，整體份量飽肚，而口感亦不俗。

E.A.Tips﹕

(1) 御守壽司離奧海城只係4分鐘步程，位置大概於海富商場、富榮花園之間。

(2) 小店同茶飲店茶星人共用同一間店，只有大角嘴嘅茶星人先有御守壽司。

(3) 每份便當都有Wasabi、豉油提供，但便當內亦同時有Wasabi。

(4) 學生有優惠，$45至$50便當加配$15至$20茶飲。

(5) 憑茶星人x御守壽司單據去齊柏林熱狗店，有9折優惠。

(6) 建議自己配搭返日式綠茶，會更有日本小店感覺。