夏日來臨，又係時候兩個人搵個沙灘玩吓，當中石澳就有兩個沙灘，一邊聚集港人，而另一邊則聚集西人，海水清澈，任君選擇。另一邊廂，石澳情人橋曾因颱風「山竹」吹襲而倒塌，但月前已經重開，搶眼嘅粉藍色情人橋又再次演變成拍拖情侶朝聖之地，而情人橋背後其實重有一道小路，可以於高點回望石澳漁村風景。
香港南區石澳向來係熱門遊覽地，小漁村有一幢幢色彩鮮艷嘅房屋，髹上馬卡龍色調後鮮艷奪目，宛如彩色童話村，海邊小屋充滿歐陸風情，一度吸引唔少少女打卡，加上附近有兩個沙灘，遠離市區，環境優美，氣氛悠閒，附近更有龍脊步道、鶴咀海岸、大浪灣，適合熱愛異國風情同陽光與海灘嘅朋友。
從石澳巴士總站落車，即抵達石澳泳灘，沙灘地方偌大，目前人流唔算太多，大多數都係本地人，而且向來被評為一級泳灘，屬良好水平。而折返迴旋處後，沿石澳村公廁方向走，不單可見到一幢幢歐陸風彩色小屋，沿小路走進去，再沿白色長堤走，可找尋石澳一隅打卡位，純白主調弧形建築物構圖不俗，雖然只係一座石澳基本污水處理廠。
往前走進，可以去到石澳後灘，即係經典電影《喜劇之王》內周星馳、張栢芝拍攝地方，石澳後灘背後就係石澳健康院。石澳後灘最大嘅特色係以西人為主，沙灘內聚集嘅都係外藉人士，鮮有本地人或內地人，後灘面積較小，但水質方面則較為清澈，水清沙幼，可算係消暑勝地。不過泳灘就無救生設備或基本設施，但仍有唔少人進行水上活動，例如滑水、獨木舟，想游水都係去返石澳正灘啦！
折返原路，沿石澳山仔路走，可前往近月重開嘅石澳情人橋。經颱風「山竹」吹襲，整座粉藍色長橋變得支離破碎，浪漫景象被徹底摧毀，「情人橋」頓變「分手橋」，由2018年9月到2021年4月，終於恢復原狀，由「分手」到「復合」足足用咗2年半時間。而石澳情人橋又叫藍橋，而藍橋之所以叫情人橋，係來自60年代，連接石澳山仔、大頭洲兩地，由於橋身狹窄，只係可以俾兩個人同時走過，海邊有巨石海浪，代表海枯石爛、山盟海誓，有如天涯海角，吸引唔少拍拖情侶打卡或準夫婦拍攝婚照。值得一提，石澳藍橋其實位處連島沙洲之上，連接石澳山仔同大頭洲，遇上天晴時候，夢幻粉藍色調配上蔚藍天空，絕對會藍上加藍！
好多人走到情人橋就以為係盡頭，其實沿背後小山路扶搖直上，可以沿其中一段石屎路去到石澳盡頭仿古觀景亭，沿海步道路段簡單，全為石屎路，只需5至10分鐘就可以攀登山頂涼亭位置，沿途既可望海蝕隙，亦可觀賞大頭洲受億年風同海浪假蝕嘅古怪岩石，怪可嶙峋，而四面亦有眾多峭壁，有如地質公園。從大頭洲觀望，一端可遠眺五分洲，另一端則可眺望東龍島，更可回望石澳全景，享盡無邊際大海景，係觀賞日落、夜景嘅好地方，而官方最高點本來有一座標高柱，但同涼亭一樣已經被山竹摧毀。
而另一段路則可走到另一邊海岸盡頭，可眺望小西灣、將軍澳方向，亦可回望石澳風景，不過盡頭其實係渠務處設施，可見警告牌，加上山路崎嶇而跣腳，其實不便再繼續向前走，最好都係原路折返。不過，大頭洲人流稀少，風景優美，可當作一個小旅行㗎！
E.A.Tips :
❷ 謹記保持清潔，自己垃圾自己帶走。
❸ 影相還影相，唔好為打卡做出任何危險行為。
❹ 石澳停車場旁有士多可作補給，石澳山仔路前亦有士多，不過穩陣啲最好喺筲箕灣先作補給，純粹建議，唔講理由啦。
❺ 留意石澳泳灘救生員當值時間為星期一至五09:00至18:00，星期六、日為08:00至19:00。
❻
❼
石澳
南區
24hours
在〈夏日去邊個沙灘？粉藍情人橋重開打卡地再現！石澳盡頭闖大頭洲回望小漁村尋靚景〉中有 1 則留言
留言功能已關閉。