【沙頭角一日遊】禁區開放率先參觀！多個T形街牌／皇冠郵筒／中英街重現七色小屋、三文魚屋、最長碼頭13大景點打卡｜附簡單1步申請禁區紙方法

踏入2024年1月，沙頭角一帶終於實行第二期開放計劃，香港人只要申請禁區紙，就可以拍拖兩個人去沙頭角自由行啦！不過，原來大部份名額為旅行團客人，只有大概三份一為個人名義旅客。即睇E.A.Two推介沙頭角一日遊行程，以及如何申請沙頭角禁區紙，探索禁區風景。除咗有七色小屋與全港最長碼頭可以打卡，多個殖民時期T形街牌、皇冠郵筒，以及中英街亦卒之重現！

沙頭角禁區開放須知

沙頭角從1951年起已被列為禁區，近年電影《緣路山旮旯》曾於沙頭角取景拍攝。沙頭角邊境禁區於上年6月曾經有第一期開放計劃，但為期較短，而且當日必須要打針先可以進入，所以編輯並未能做第一手資訊。而由今年1月1日起，沙頭角第二期開放計劃正式開始，編輯於首階段已經提出申請，終於可以進入沙頭角禁區範圍。只要登入「警務處網上服務申請平台」，即可以申領沙頭角旅遊禁區許可證。(下面有詳細申請步驟及小貼士)

沙頭角禁區開放時間為每日早上7點至晚上9點，旅客只可以於呢個時間內喺沙頭角邊境禁區逗留。成功爭取沙頭角禁區紙後，可於進入時間後於沙頭角禁區遊覽。不過，據悉沙頭角禁區紙每日只限1000個名額，當中有700個為本地旅行團所有，故此僅有300個為個人名義嘅本地自由行旅客，先到先得，想要揭開邊境禁區神秘面紗，情況等同爭崩頭。

沙頭角邊境禁區基本上都開放入場，但唯獨「中英街」仍然局部開放，尚未解禁。進入沙頭角後，只係出示禁區紙後，勉強可以走入「中英街」街牌位置，一幕之隔就係大陸範圍。如果要走入「中英街」，必須要先於各口岸前往深圳，然後再走去「中英街」另一邊。

沙頭角一日遊景點﹕（1）沙頭角邨七色小屋

以往從鹿頸、鳳坑、谷埔一帶能遠眺沙頭角彩色房屋，現時持有「禁區紙」就可以自由進入沙頭角禁區範圍，一睹其廬山真面目。事實上，海旁一整排七色小屋，為香港房屋協會旗下嘅第二個郊區公屋，離遠都能清楚目睹彩虹色小屋。

呢一排七色小屋係沙頭角邨「迎海樓」，採用歐陸式風格設計，無論公屋設計，抑或係用色上，都係非常搶眼，比「彩虹邨」、「南山邨」等更值得打卡。

沙頭角一日遊景點﹕（2）順平壁畫街

距離沙頭角巴士總站不遠處，馬上會見到有一塊人造嘅「中英街」石碑，位置就係特別設下嘅「順平壁畫街」。其實，該壁畫街並非有連綿不絕嘅壁畫，只有寥寥幾幅，但當中已描繪沙頭角當中嘅傳統文化及各式活動。

其中，包括有每年舉行嘅天后醮典，為沙頭角一帶嘅傳統習俗，該區居民每10年更會有大型酬神礁典，慶祝活動包含陸上龍舟。另外，更有沙頭角魚燈廣場內嘅魚燈舞場景，據悉為國家級非物質文化遺產。從壁畫中可見，各項礁典都已描繪出嚟，活現眼前。

沙頭角一日遊景點﹕（3）沙頭角邨三文魚屋

沙頭角邨其實並非只有一整排七彩公屋值得留意，當中重有一幢「三文魚屋」。房屋外牆粉嫩橙色加上白色橫紋粉飾，有如一片片三文魚狀，有如一片片三文魚。

事實上，沙頭角邨於1988年已經落成，用作安置鹽寮下、菜園角寮屋區嘅原居民。本來呢幢房屋只係呈素色，後期「迎海樓」加上七彩繽紛顏色，故其他舊期公屋都逐步修飾，最後呢幢就於2020年進行翻新，形成「三文魚屋」。

沙頭角一日遊景點﹕（4）沙頭角郵政局皇冠郵筒

相信有留意E.A.Two嘅讀者都會對殖民時期皇冠郵筒有一定認識，以往因為未能踏足沙頭角，故仍然未有為「沙頭角郵政局」另一個僅存嘅皇冠郵筒留念。事實上，「沙頭角郵政局」嘅皇冠郵筒先至係其中一個具有歷史價值及意義嘅文物，但偏偏連一小個簡介牌都無，只係內裏有沙頭角相關明信片可以買，亦有郵局獨有郵章可以蓋於官方小書空白頁內。

「沙頭角郵政局」嘅皇冠郵筒呈郵箱狀，上面隱約可見郵島本來係紅色，只係換上綠色裝扮。上方寫有「Posting Box」、「Posting Office」，以及中文字「郵箱」，顯然該郵箱目前依然服役當中。

此外，郵箱上仍然可以見到「ER」字樣，代表該沙頭角郵箱係來自「英女皇」伊利沙伯二世嘅年代。而郵箱底部亦可見「W T Allen & Co Ltd, London」字樣，表示郵箱嘅製造商名稱。

沙頭角一日遊景點﹕（5）沙頭角舊消防局

毗連「沙頭角郵政局」嘅「沙頭角舊消防局」，位於順隆街與順平街一帶，門前有簡介牌。消防局由1962年起啟用，直到2004年2月退役，而外觀上獲得保留，故亦係沙頭角其中一個地標。

雖然有指舊消防局門外會不定期展示1:1嘅復刻版消防手推車，但當日就未有見到有任何展示品，而消防局亦非開放公眾參觀嘅地方，所以公眾只能從外觀望舊消防局設計，入場後不妨留意吓同沙頭角檢查站旁邊嘅新式消防局有咩分別啦。

沙頭角一日遊景點﹕（6）粉沙鐵路火車頭

禁區內大多數地方已經被翻新，當中「鹽寮吓」及「中英街花園」附近亦特別擺放有一架「粉沙鐵路火車頭」及「粉沙鐵路火車站」裝飾。不過，該裝飾其實只係一個模仿香港舊式火車嘅1:1火車頭，並非真實火車頭，但已經足以吸引唔少人上前打卡。可見大多數人對真正歷史唔太重視，反而鍾意純粹裝飾嘅展覽。

「粉沙鐵路」即係來往粉嶺及沙頭角嘅鐵路，原先係1910年代建立，係KCR九廣鐵路支線，當時建成後全長有約7.25英哩。「粉沙鐵路」於1912年通行，僅設有3個站，並無上簷，車站設計簡單，亦有售票員，路程大概需時55分鐘。而由於沙頭角公路於1928年落成及通車，所以「粉沙鐵路」於該年4月亦隨即關閉，成為九廣鐵路中一道消失嘅支線。

沙頭角一日遊景點﹕（7）沙頭角街市「海味街」

沙頭角區間中會有居民擺放禁區市集，當中僅有約10個攤檔，但亦唔係經常都會有。不過，區內有唔少基本社區設施，其中沙頭角街市地方不大，係居民日常前往嘅地方。街市內既有熟食中心，亦有少量攤檔，同樣有沙頭角特產，為小型「海味街」。

沙頭角一日遊景點﹕（8）禁區5大T形街牌

提到沙頭角路線最值得去嘅地方，必然係找尋禁區內嘅5個僅存T形街牌啦！唔少人對官方製造嘅打卡裝置情有獨鍾，但偏偏真正充滿歷史意義嘅香港舊式街牌置若罔聞。

沙頭角禁區內共有5個英國殖民地時期嘅舊街牌，全部呈T字形，每一個街牌都係呈上英下中，中文字都係從右到左顯示。舊街牌中最容易搵到嘅係「鹽寮吓 YIM LIU HA」，因為街牌既近「中英茶餐廳」及「中英街花園」，亦毗連粉沙公路火車頭裝飾。

值得留意嘅係「車坪街 CAR PARK ST」，從呢個最古舊嘅T字街牌可見，英文係「CAR PARK ST」；但下面新式街牌寫住嘅係「Che Ping Street」。估計當初係從英譯中，但後來就變成中譯英，左右翻譯可演變成唔同意思，甚為有趣。

而「新樓街」最特別之處就係擁有香港僅餘嘅大型廣州式騎樓群，而呢幾幢廣州式騎樓群中，就依然有2個T形街牌完好保存，2個街牌都寫有「新樓街 SAN LAU ST」。而該幢廣州式騎樓群建築，係來自於20世紀，下舖上居，上方多數係住宅，部份係業主自住，亦有部份係出租住宅用途；而下面大多數都係商舖，包含有糧油店、金行、鐘錶行等。據了解，「新樓街」合共有22幢騎樓，早於2011年已經列入香港二級歷史建築物，現時仍然係沙頭角禁區內比較熱鬧嘅地方。

更特別之處係「新樓街」本身設有警崗，聽到隔離帶團導遊講述，以前「新樓街」呢個位置係中港兩地可以來往嘅地方，以前「新樓街」係人群穿梭兩地嘅地方，而「中英街」就係貨物穿梭嘅地方。但時而勢易，大多數能穿梭兩地禁區嘅人群，都會選擇「中英街」。而「新樓街」方面，目前就已經被完全封閉，重門深鎖，兩邊禁區嘅人都只可以遙遙相對。

講到最神秘又最難搵嘅沙頭角T形街牌，必定係「蓮麻坑道 LIM MA HANG RD」！因為「蓮麻坑道」舊街牌係位於禁區內嘅禁區，即係大陸範圍，必須要指定角度先可以一窺街牌模樣。

沙頭角一日遊景點﹕（9）中英街花園＋中英街街牌

對香港人來說，最希望解禁嘅一定係「中英街」，但縱然沙頭角大部份地方已經開放公眾，但「中英街」主要關口至今依然未有開放。官方僅於關口附近設有「中英街花園」裝飾，當中有一個「許願瞭望台」，想要一窺「中英街」關口嘅朋友，基本上只能從瞭望台觀望，呢一點係未有實地參觀沙頭角嘅內容農場平台同大家介紹。

一直以來，「中英街」都係本地最神秘嘅禁區地帶，想要進入或穿梭「中英街」，就必須要持有特定禁區許可證，於「中英街警崗」檢查站出示先可以出入。

只要親身到現場，自然會知道持有沙頭角「禁區紙」，其實係可以進一步窺視「中英街」。到達「中英街警崗」後，向警員再次出示「禁區紙」，係可以繼續向「海山樓」及「中英街」街牌前行。只不過，即使出示「禁區紙」，亦只能於「海山樓」及「中英街」一帶小巷停留。換言之，可以進入「海山樓」餐廳進食，可以前往「中英街」街牌，以更近距離窺視「中英街」，但就唔可以跨越「中英街」。

更特別之處，係呢個禁區盡頭位置不單可以睇到「中英街」街牌，而且可以隔住玻璃近距離望到「中英街」界碑。從禁區觀察，下方寫有「2」字，所以估計係「中英街第二號界碑」。據悉，「中英街」合共係有七座界碑石，其中「中英街第五號界碑」已經擺放於「香港歷史博物館」中作展示用途。

沙頭角一日遊景點﹕（10）法定古蹟協天宮

沙頭角檢查站附近可見「天后廟」，海旁可眺望「順興島」。而距離沙頭角市區較遠之處，亦有一個隱藏嘅法定古蹟。「協天宮」係能反映上世紀海外華人社會同沙頭角地區社會裝絡嘅地方，設計上可眺望其三葉拱形門、正立面青磚外牆、花崗石門框等，相當精緻。事實上，「協天宮」於2021年7月已被列為法定古蹟，受《古物及古蹟條例》保護。

沙頭角一日遊景點﹕（11）沙頭角之角

提到沙頭角數一數二打卡點，對大多數人來說必然係「沙頭角之角」。以T形街牌模式設計嘅「沙頭角之角」，上方寫有「沙頭角之角 CAPE OF SHA TAU KOK」，對落則刻有經緯度座標牌，而下面石碑更寫住「日出沙頭月懸海角」，詩句出自一位到廣東沿岸視察嘅清朝大臣。一方面可以望向東面日出，另一方面背後「日月亭」亦係觀賞落日餘暉嘅地方。

「沙頭角之角」位置正正係沙頭角以東，而且係最東面嘅一角，下面石碑更模仿「中英街」界碑石，所以呢個位置其實只係官方製造出嚟嘅打卡位。不過，「沙頭角之角」係賞景一流位置，一方面望向本地水域，另一方面則為深圳水域，海景一望無際，亦可眺望對岸深圳，水灣風光盡收眼底。

沙頭角一日遊景點﹕（12）沙頭角故事館

位於「新樓街」騎樓建築群內嘅「沙頭角故事館」，位置係舊時嘅「新隆金行」，入場費人均$30。但據隔離帶隊導遊所講，沙頭角禁區開放至今未曾開門過，就算想入去睇沙頭角歷史故事，亦似乎未係時候。即使E.A.Two編輯再三向官方詢問，都無人答覆，直到1月17日下晝先有答覆話需要預約，所以可以被稱為其中一個「搵笨景點」。

雖然「沙頭角故事館」好似「中英街」嘅重門深鎖，但亦只能從門縫偷偷窺視，門後係一道木樓梯，階級上刻有字樣，包含有沙頭角發展史。

沙頭角一日遊景點﹕（13）沙頭角碼頭海旁

沙頭角碼頭係全港「最長碼頭」，從頭到尾足足有280米長，步行到尾亦非1、2分鐘嘅事。沙頭角碼頭沿岸有多幅出自小學生嘅壁畫，將沙頭角獨有文化繪成色彩繽紛嘅壁畫，中途可見唔少釣魚客，而盡頭更有純白燈塔及「天涯海角」裝飾。

其實，沙頭角碼頭於60年代已經建成，海水較淺，較少船隻停泊。不過，該碼頭仍然有少數街渡路線，可乘搭渡輪來往吉澳、荔枝窩、鴨洲，船程比從馬料水出發更短，大概只需30分鐘。

沙頭角碼頭至海濱長廊一帶，有「沙頭角鏡中鏡」之稱，水面平靜，形成天空之鏡，將沙頭角風景反映於海面上，風光如畫。，另一端更可從水面倒影透視沙頭角邨七色小屋，若加上黃昏日落，正好為沙頭角一日遊作結。

沙頭角美食

沙頭角有唔少地道小食，例如係炸油糍、手工米通、客家茶粿、老婆餅、客家缽仔飯、蠔餅麵、咸菜雞飯、墨魚餅等，亦有超過10間餐廳。當中，有街角冰室、海山樓、沙頭角餐廳、炳華餐廳、芳記、金源士多、金記餅店、明園餐廳、大興茶餐廳、農莊餐廳、好記茶室、強記飯店、海記茶室、龍記小廚等，有帶隊導遊推介街角冰室及附近華記小食。不過，編輯建議於上水醫吓肚食飽飽先進入沙頭角，唔好問點解。

在 Instagram 查看這則帖子

https://eatwo.info（@e_a_two）分享的帖子

申請沙頭角禁區紙步驟

想要申領沙頭角第二期開放計劃嘅電子旅遊禁區證，只需要登入「香港警務處網上服務申請平台」，以電郵、本地手機號碼等方式，先註冊帳戶，登入後填寫表格，包括向當局提供多項個人資料，以及上載身份證明文件，然後遞交申請，以獲得「電子旅遊禁區證」。

「禁區紙」費用全免，基本上於該平台申請「禁區紙」後，當日我哋馬上得悉批核情況，數分鐘內就會獲批，遲啲多人申請就有可能需要較長時間。申請後，申請人可以隨時於該平台查閱進度，「禁區紙」上會有個QR Code。若遇上問題，可以致電8226 1886嘅24小時專線尋求協助。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 必須登入「警務處網上服務申請平台」，先可以申領沙頭角旅遊禁區許可證進入沙頭角，俗稱「禁區紙」。

❷ 沙頭角小店唔多，唔好問點解無介紹餐廳，我哋建議於上水搵間小店食完先入沙頭角禁區。

❸ 沙頭角交通方面，於上水總站乘搭巴士78K，即可直達沙頭角總站，中途會經粉嶺。而同樣於上水小巴站上車，亦可乘搭小巴55K，直達沙頭角總站。而巴士277A甚至可以於藍田出發，直達沙頭角總站。至於想來往旺角等鬧市，離開時乘搭78K時，於皇后山一帶巴士站轉乘直達皇后山嘅巴士專線79K，過即可經青沙公路直出九龍西一帶。

❹ 巴士與小巴分別在於警員查核禁區紙方式唔同，乘搭小巴就會有警員登上小巴查證，而乘搭巴士就只需於落車時出示禁區紙就得。

❺ 為避免有人渾水摸魚入境香港，所以離開時都會有警員上車再次查核禁區紙，所以謹記離開前都唔好刪除為丟棄禁區紙。

❻ 沙頭角暫時未開放一般交通工具進入，所以必須要乘搭公共交通工具。沙頭角碼頭可來往荔枝窩、吉澳、鴨州，但每日僅有3班街渡循環航線。

❼ E.A.Two實測後有小小建議，最好預先列印禁區紙，皆因大部份人都係只係用電子禁區紙，而警員查核時見大家都慢慢搵，會先查看遞上紙本禁區紙嘅我哋，可以避免無謂等候時間。