提到地質公園，大多數人諗起嘅都係橋咀島等熱門景點，編輯反而想提及荔枝莊內鮮為人知嘅香港世界地質公園，各種風化岩石極具觀賞價值，而荔枝莊既連接白沙澳，亦可直通往深涌，擁有綠草如茵大草地嘅深涌曾一度係露營發燒友愛到嘅戶外露營地，拍拖兩個人於大草地內散步行逛，空氣清新，令人放鬆又自在。
荔枝莊位處西貢西郊野公園內，近西貢北面，而荔枝莊有指係因種植巨大荔枝樹，但事實則無從稽巧。由荔枝莊公眾碼頭落船，先唔好急於前往石屎路段，雖然石屎路段左邊係一個小石灘，既有紅樹林，亦可以摸蜆，不過可以先步行往碼頭右邊，探索吓荔枝莊內被列為香港世界地質公園兼具特殊科學價值地點嘅必去景點。
碼頭旁邊沿路一直前行，皆為一層又一層風化岩石，為一個超大型嘅黑色岩石灘，5公頃石灘內嘅岩石畫面比東平洲、橋咀島、馬屎洲更精彩，而岩石比東平洲更歷史悠久！岩石包含沉凝灰岩、火山沉積岩、石英脈、滑塌構造、巨礫灘、被稱為洗衫板嘅褶曲、燧石層、粉砂岩，岸邊岩石層層堆疊，遍佈岩層，顏色獨特，紋理標緻，最出名就係黑色岩層，而編輯並非專業生態專家，則不便詳述獻醜啦。不過，當中嘅沉凝灰岩係來自一億年前嘅火山爆發，經最終經火山灰堆疊而成，而火山沉積岩亦係來自火山爆發後嘅岩石，不過需經雨水積聚沉澱，變成燧石層、火山沉積岩。
荔枝莊地質步道內嘅石灘凹凸不平，寬度約100至200米，岩層眾多，結構複雜，岩石奇形怪狀，海水寶藍色調，配搭部份岩石啡中透紅，甚為吸睛，尤如0天然顏料柒上色彩，甚至連貝殼都有粉紅色呢！石灘岩石經過歷史悠久嘅地殼運動後，形成唔同種類嘅岩石層理橋造，地殼移動又會造成岩石斷層或褶皺，值得兩個人前往散步考察吓兼影吓相。
而荔枝莊只係一個寧靜小村落，內有大草坪，沿海旁而走可以探索吓小村，穿過小徑即可到達，荔枝莊內有唔少村屋，而村內部份地方寫明私人土地，甚至有惡犬駐守，本來四野無人非常寫意，但安全起見都係盡快徹退。
由荔枝莊前往深涌，可以挑選兩條路走，第一條路係折返碼頭，經石屎路上山，部份路段稍有斜度，接駁寬闊山路，經過南山洞、蛇石後，到達一個蛇石坳分岔路口，繼續前行落山就可以直達深涌，整個路段輕鬆易走，適合新手。
而第二條路則比較複雜，無需要折返碼頭，前行至近石灘盡頭，會見到一個小樹蕞入口，路段於Google Map亦有綠色虛線，雖然係捷徑，但其實係一道爆林之路，比較崎嶇難行，而且極狹窄，由小海灣上山係需要手腳並用於山中爬上山。經過雞麻峒山頂位置後，即可以落山前往分岔路口，會合返蛇石坳分岔路口後，轉右即可以直達深涌方向，後段為較寬闊山路，相對易走，15分鐘可前往深涌。
深涌靠近海旁，三面環山，包括石屋山、石芽頭、畫眉山，更擁有全港最大片嘅草坪，曾為電影《早熟》拍攝場地，而大草地曾經係收費營地，一度為露營好地方，可惜現時場地已更改土地用途，將予發展商興建水療度假村，目前已不準露營。現時，深涌人流極少，可望翠綠山巒、青蔥大草地，走過林蔭小徑，於深涌農莊大玩特玩，散步、打卡都無人阻榴兼爭位，絕對係郊遊好去處。
而深涌內有草原，亦有濕地、淡水沼澤、溪流，而深涌本身就意指內陸加鹹淡水交界，而深涌村內有客家村落，內有5條村，以務農為主，有逾200年歷史，包含聖教堂村、對面村、石頭徑村、包尼仔村、灣仔村，村內有三王來朝小堂，歷史可追塑自19世紀，屬天主教堂，不過已荒廢。如果只係深涌環島遊，基本上全程皆為平路，可以輕鬆感受田園風光，風景怡人，樸素自然，趁土地仍然可以自由出入，多走兩轉，感受該地餘下嘅悠閒感覺。
E.A.Tips :
❷ 馬料水公眾碼頭前往深涌碼頭船程約30分鐘，一小時內會到達荔枝莊碼頭。
❸ 由陸路前往深涌，可以經水浪窩，巴士路線299X可由沙田前往水浪窩，而巴士路線99號亦可由烏溪沙前往水浪窩，落車後步行1至1.5小時會先經過企嶺下、榕樹澳，再步行1至1.5小時就會到達深涌。
❹ 注意榕樹澳為禁區路段，唔可以自駕，最多只可以坐的士。
❺ 除咗經過水浪窩、榕樹澳，亦可從白沙澳前往荔枝莊，再通往深涌，於西貢乘搭小巴路線7號即可到達白沙澳，大概要走1.5至2小時先到達深涌。
❻ 僅記帶備充足耀水，同時做足防曬、防蚊措施。
❼ 沿途少有補給點，要到深涌農莊先有士多，不過士多5點左右就會關門。
❽ 深涌尾班船為18:15至18:30，先留意時間，最好預早時間到達碼頭，18:00於碼頭等候就萬無一失啦。
❾ 深涌大草地與深涌碼頭距離約需步行10至15分鐘，最好預留充足時間。
❿ 巴士路線43P,43S,73D,74D,74P, 82C,82D,263A, 271B,272A,272K,272P, 272S,274P, 900、小巴路線27,27A,27B都可到達馬料水公眾碼頭。
⓫ 由荔枝莊前往深涌可以從最正途嘅石屎路步行到寬闊山路，經過南山洞、蛇石，適合新手步行；另有一道爆林路線，可從捷徑步行到分岔路口接駁寬闊山路，再前往深涌，該路段沿途會經過雞麻峒，不過山上路就比較崎嶇難行，雖然全程有山友提供嘅絲帶路，但新手絕對不宜。
⓬ 荔枝莊地質公園觀察岩石嘅話，最好等潮退時候。
荔枝莊
新界西貢半島石屋山北麓
深涌
新界西貢半島以北