蘑菇麵包店

推介即切即食新鮮火腿!西貢隱藏版麵包店屹立逾10年 超高水準麵包紮實兼飽肚

即將踏入秋天,又準備到行山季節,西貢山徑亦預計愈來愈多行山客,拍拖行山時謹記要帶備充足糧食同飲用水,有見及此,編輯推介一間於西貢有多年歷史嘅麵包店,方便大家儲糧上山,麵包質素於水準之上,值得兩個人去試一試!

西貢墟內嘅蘑菇麵包店於區內屹立十幾年,製作自家麵包,但一直無廣泛宣傳,門口有如舊式麵包店,行過路過未必會留意呢一間隱藏西貢嘅街坊麵包店。踏入店內,麵包名稱、價錢皆以全英文標籤,客人多為外藉人士,形象與門口截然不同。

麵包款式以西式為主,並非如同一般港式麵包店,比如超長法國麵包、牛角包、蘋果批、芝士條、芝士蛋糕、鬆餅等,每款麵包都以平靚正打造,店內招牌作蘑菇雞肉批$30為隱藏版美食,需要詢問先有機會有得食,批內包含豐富餡料,蘑菇、雞蛋都填滿批內。而Curry Mince Beef Puff $30 即蘑菇咖喱牛肉餡批,色調金黃,有濃郁牛油香味,批內有濃厚咖哩茨汁,配合碎牛肉餡料更有層次,比起連鎖店更有水準。

Pandesal $5係一種鹹麵包,名稱為西班牙文,於菲律賓流行,麵包呈長條狀,抵食而足料,質感紮實,有麵包香,唔係過份鬆軟感覺,食一舊已經足以飽肚。至於Cinnamon Twist $10 則為肉桂卷,呈螺旋紋狀,層層如絲,表皮有酥香,麵包帶微甜,含微微肉桂香味,不過唔太重味,唔會太油膩,同樣有重量同厚實感。Sausage Roll $18 為好簡單嘅腸仔包,不過就同一般港式麵包店嘅腸仔包並唔一樣,質感較厚實,而且呈長條狀,外形有幾分似迷你版法包,幾得別。

Scotch Egg $20 係一款好特別嘅麵包,外表似足一個球狀物體,如同一個波,從外面觀察係完全唔知入面有咩內餡。呢款係一款英式料理,亦叫做蘇格蘭炸蛋,其實係麵包內混合絞肉同烚蛋,然後搓成丸子狀,再拎封油炸。品嚐時將球體切開,方才發現內餡原來係一隻雞蛋!表皮一層略為硬身,中間一層亦有紮實感,而最中間則為一顆雞蛋,令整件麵包入口蛋香十足。

喜愛英式下午茶嘅女士們一定會挑選Scone $11,店內嘅英式鬆餅有3種口味,內餡可能有南瓜、芝士或提子。相對平常下午茶食嘅鬆餅,小店雖然只係賣$11,但鬆餅超大件,有一個拳頭咁大!鬆餅質感紮實,但又同時有濕潤感,唔會太乾身,食一件鬆餅足以飽肚,相信女士們一個下晝都唔會嗌肚餓。

Ciabatta $18 意大利橄欖油包只係由麵粉、酵母組成,係一種表皮有脆感嘅意大利白麵包,又叫做拖鞋麵包,來自1982年嘅意大利,有時會被製成三文治。店內嘅Ciabatta都好正宗,表皮輕脆,內裏軟腍,只有濃濃麵粉香,無多餘調味,配搭橄欖油一流。不過,麵包並無配上橄欖油,想蘸上橄欖油就需要自己另外添加。Donuts $8 水泡冬甩價錢低廉,亦係簡單一件冬甩,以麵粉混合砂糖、奶油、雞蛋,無太多花巧口味。

小店既然係以英文為主嘅麵包店,亦由菲藉員工打理,固然要試吓菲律賓嘅麵包啦!當中有一款係Star Bread $5 菲律賓甜星星包,從側面觀察,似足一個又一個貓頭;而從上面觀察,則恍如四角星星,故麵包就叫做星星包,呢款麵包質感極紮實,入口偏硬,只有微微甜味,多數都係麵粉味,並無其他味道,對部份人嚟講,味道可能較為清淡。而另一款則為Ensaimada’s $7 牛油砂糖麵包,只有牛油、砂糖調味,麵包軟身,表面塗滿牛油,再灑滿砂糖,入口既有牛油香,亦有粒粒砂糖顆粒感,調味簡單,用料平價,食落卻有層次感。

當中,編輯於店內最推薦嘅選擇反而唔係麵包,而係一款即切嘅即食熟火腿!Freshly Baked Honey Glazed Ham $28 per 100grams 放置於店內中央位置,相當搶眼,一大件原隻火腿擺放小箱內,向店員提出要即切火腿,店員就會馬上將相應價錢或重量嘅火腿切出。火腿入口新鮮,而且有啖啖煙燻味,火腿並無多餘調味,反而更有濃郁火腿香。相對於坊間經過處理嘅Parma Ham,編輯更愛呢款新鮮即食嘅火腿,每一次到西貢都會忍唔住買一大包喔!

E.A.Tips :

❶ 乘搭西貢小巴於西貢墟落車,對面馬路即可見到麵包店,靠近咖啡店Cozy Cafe。

❷ 雖然價錢牌同麵包名全為英文,但放心,店員係識聽中文同識講中文嘅。

❸ 注意蘑菇雞肉批係限量製作,售完即止,放置於雪櫃內。

❹ 店內無堂食地方,只可外賣。

❺ 店內亦有冷凍肉類餸菜材料包,可以任君選擇。

EATWO
Miss A
蘑菇麵包店

磨菇麵包店

西貢普通道56號地舖
06:30 – 20:00
2792 6826