無日式叉燒？西貢小型居酒屋午市拉麵配串燒$40起離碼頭僅2分鐘步程！

西貢係夏天、秋天熱門嘅香港好去處，夏天多水上活動，而秋天就多行山活動、露營活動，去西貢搵食，除咗食街小巷，其實出面重有好多可以拍拖兩個人去試吓嘅餐廳，今次就搵到離碼頭不遠處嘅一間迷你居酒屋，以串燒為主打，午市套餐最平只係$40，特別在於一碗水準不高嘅普通拉麵並非配搭日式叉燒，而係其他配料，大多數都係店內主打嘅串燒。

拉麵愛好者對於拉麵有一定要求，可能未必能將此店嘅拉麵食得落肚，因為只係一般人於家中能夠煮到、用嚟頂肚嘅拉麵。編輯並非拉麵專家，對於拉麵只有「好」與「不好」嘅評價，店內拉麵湯底有5款可擇，包含日式豬骨湯、麻辣湯、地獄辣湯、日式醬油湯、味噌湯，湯底較稀，味道不濃郁，麵底亦一般，如同平常家中肚餓攡出嚟煮嘅拉麵包。

事實上，店舖係一間小型居酒屋，主打嘅並非拉麵，而係串燒，當中有招牌燒金磚$15/串、燒雞皮串$12/串等，而每一碗拉麵配搭嘅竟然唔係平常拉麵都會見到嘅日式叉燒，而係唔同款式嘅串燒！拉麵配串燒風格獨特，或者可彌補返拉麵嘅不足之處，配料有燒雞翼、燒豬頸肉、金菇肥牛、燒鴨胸、吉列炸蝦、帆立貝、洋蔥牛肉、素菜雜錦、豬軟骨、燒廣島蠔、鹽燒牛脷、日本黑豚肉等，主角變成串燒，而非拉麵。

如果挑選一碗雜菌牛肉日式豬骨湯拉麵$48，可能就大錯特錯，皆因牛肉、菇菌都為白灼，味道較清淡，雖然份量適中，但未能一個價錢同時能品嚐串燒。反而其他選擇如牛仔骨日式豬骨湯拉麵$55，就幾有水準，串燒另上，飽肚之餘亦可以食到原汁原味串燒。單單配搭牛仔骨已有濃濃燒烤香味，即叫即燒，醃料唔重味，滲出油份，油脂豐腴，肉質結實，肉有牛味，不過牛肉偏薄，或者單點串燒會較好。

飲品每杯半價反加約$10，當中有檸檬柚子蜜、蜂蜜紅棗茶，簡單沖泡嘅飲品，甜度控制上可以接受，食完油膩而帶鹹味嘅串燒後，亦可解膩、解渴。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 小店舊址為西貢市場街47號地舖，現址為西貢福民路42-56號西貢大廈A座地下2號舖，離碼頭僅約2分鐘步程。

❷ 店內只收Cash。

❸ 有提供船河或Party等到會食物，需要預早訂購

❹ 店內有中英文餐牌提供。

❺ 留意逢星期一休息。

❻ 星期二至五6點半前都會送熱飲，凍飲加$2，其他飲品就半價；而星期六、日及公眾假期就飲品一律半價，汽水就要正價。

❼ 除咗拉麵，亦可挑選烏冬、飯類，甚至冷麵、冷烏冬、撈麵。