1小時走完舂坎角秘道！赤柱古道窺視老虎坑獅子坑遺跡百年大小石拱橋宏偉壯觀

今年初，港島兩條荒廢古道內嘅歷史遺跡備受關注，古道內含有大型石拱橋，吸引唔少行山客慕名而至，但就未必人人都識得去，今次編輯就先帶大家拍拖兩個人走走其中一條古道，1小時內足以走完整條古道，路段於地圖上甚為隱蔽，但其實簡單而行。

赤柱古道離赤柱廣場並不遠，不過編輯建議從另一個路口進入，最後於赤柱廣場方向離開。整條古道路段寬闊易行，而且鮮有上落斜，輕鬆找尋可以追塑至開埠初期嘅歷史痕跡，當中包括有老虎坑、獅子坑，於Google地圖係完全唔會搵到赤柱古道、老虎坑、獅子坑嘅結果，但其實非常容易找尋得到。

於中環交易廣場乘搭巴士路線到舂磡角道11號站落車，折返舂磡角道與赤柱峽道路口，南區海濱長廊路牌後方可見有一道下行小樓梯，樓梯甚陡峭，依循樓梯向下行，直到一半不難發現山路入口，欄杆可見山友綁上嘅絲帶，沿路進入即可以走入赤柱古道範圍。

由舂磡角道入口循明顯山路前進，約5分鐘即會見到老虎坑石拱橋，可以一道灰色管道為標記。不過要下行到老虎坑就需要稍為攀爬，皆因下行斜坡遍佈碎石、苔蘚，需要步行到山溝位置先可以正面望向石橋。老虎坑足足有約10米深，同時有20米闊，石磚堆疊起石橋亦相當有氣勢，而石橋背後有一道引水道，有如小隧道，可通往另一端，欣賞吓內部建築，不過只係另一邊，無乜特別，只為掘頭路，都要折返原路繼續前行。

整條古道路段平坦，現時已被山友開闢，路面寬闊而行，內為石製疏水渠道，走到後段更有清晰指示牌，分別標示分岔路口可通往衛奕信徑1段或赤柱廣場，由舂磡角道入口到赤柱廣場出口，編輯連拍照時間只需1小時。

繼續前行會見到獅子坑石拱橋，同樣需下行至山溝觀望石拱橋正面，但就並無繩索，需要小心攀爬而走。獅子坑石拱橋約有3米深，大概只有8米闊，但同樣保存完整。無論係獅子坑定老虎坑，建築亦好宏偉，巨型石拱橋有如羅馬式石橋風格，石拱橋一大一小，古典味十足。

而再沿赤柱古道步行，一直會發現唔少煤氣石標示，而右邊有另一端亦有石橋，內有一個 V 形引水道，已經逐漸倒塌，上落稍有崎嶇，仔細一睇會發現赤柱古道其實係沿石拱橋頂而走，V形引水道亦位處石拱橋下方，環境有幾分似越南吳哥窟。

赤柱古道據悉屹今有逾170年歷史，於英治初期原為主要港島道路，連接赤柱至淺水灣，路段中途不時可見水渠，而赤柱古道一直以來都未有古蹟評級，意味古道內嘅石橋並非受保護古蹟文物。

古道會經過赤柱馬坑邨，出口為赤柱佳美道懲教署體育會會所旁邊，而對面則為停車場，前行1分鐘即可見赤柱廣場巴士站，此方向離開會更為方便。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 於中環交易廣場乘搭巴士路線6,6X皆可到達舂磡角道11號，落車後折返路口即可搵到入口。

❷ 赤柱古道雖然全為山路，但路面大多寬闊而平坦。

❸ 要下行到獅子坑、老虎坑石橋底，必須要小心個人安全，盡可能捉緊山友留低嘅繩索，以保障安全。

❹ 若以赤柱廣場為起點，則可以怎搭260,6,6X,973到赤柱廣場落車，再前行至佳美道入口。

❺ 夏天時盡量唔好走入引水道，免生危險，尤其係雨季，就謹記避免走此路線，亦唔好下行到石橋。

❻ 謹記要好好保護石拱橋遺跡，眼看手勿動。

❼ 記得自己垃圾自己帶走。

❽ 可以於中環或赤柱先作補結點。

EATWO

Miss A