旺角歎High Tea遊走東京每位送招財貓公仔

武漢肺炎肆虐，3月無得去日韓台賞櫻，唯有將啲錢留喺香港食好啲啦。今次就歎個東京櫻花主題下午茶，香港康得思酒店Alibi – Wine Dine Be Social與國際兒童社會企業PAPINEE聯乘推出推奇幻旅程下午茶東京賞櫻篇，有5款鹹點同5款甜品，當中仲有清酒鮑魚同2杯櫻花綻放雞尾酒，不過小編同閨蜜兩個人都唔飲酒，所以只飲茶類飲品。

呢個主題已經去到第4篇章，由墨西哥到倫敦，以至紐約，而家去到東京，未有得去旅行住，唯有食住旅行主題High Tea當環遊世界先啦。

5款惹味鹹點甚吸睛，當中有清酒鮑魚伴海膽沙巴翁，Sabayon有時會灑在甜品上，今次配鹹點同樣得宜，清酒鮑魚入口鮮甜，口感煙韌，當冷盤寧舍清新，加上海膽同Sabayon醬汁伴勻，製成濃稠綿密醬汁，有啖啖酒香同鮮甜香味。

而三文魚伴紫蘇及柚子醬亦好開胃，三文魚上有些微酸酸甜甜嘅柚子醬，入口清新。烤果仁香菇鹹批驟眼看以為係迷你葡撻，估唔到原來係一個鹹點嚟，撻內釀有果仁同菇菌類，層次豐富。至於味噌黑鱈魚伴牛油果蓉放置喺匙羹內，牛油果蓉墊底，上面係味噌黑鱈魚，入口唔似魚類，似帶子口感，黑鱈魚味道偏濃，配搭牛油果蓉令整體入口無膩感，帶有些微清新感。而燒汁手撕OBE草飼草牛肋骨法包就係法包中間釀入肉碎，將加入燒汁嘅牛肋骨肉碎伴勻，然後作法包餡料，牛肋骨肉碎同法包一濃一淡配搭得宜。

食完鹹點就到5款Sweet Sweet甜品，甜品最啱同情人拍拖去食。歎High Tea必備嘅當然係傳統英式焗鬆餅，今次伴有奶油忌廉同焙茶蘋果醬，特別推介蘋果醬，搽上鬆餅上可減低鬆餅嘅膩感，蘋果清新味道中和鬆餅焗出嚟嘅香濃牛油味。

其他4款甜品當中包含櫻花主題嘅士多啤梨卷蛋，即係一件士多啤梨蛋糕，中央餡料有一個心形設計，最啱各位少女打卡之用，似乎只有呢款甜品同櫻花主題有直接關係。而黑芝麻意式奶凍以小杯盛載，上面舖有芝麻脆餅同一個朱古力香唇，下面就係黑芝麻意式奶凍，黑芝麻液體同奶凍混合後，奶凍入口有啖啖芝麻香，入口甜而不膩。仲有一款沖繩紫薯撻，撻內釀入紫薯蓉，入口綿密又滑溜，亦有紫薯本身嘅香甜味，上面仲有心形朱古力作點綴。至於綠茶紅豆歌劇院蛋糕上面亦有Love字樣，以綠茶炮製嘅蛋糕，啖啖日本綠茶風味。