[sp_html5video category=”1688″]
位於觀塘工廈內嘅呢間台式小店，唔只「OK」咁簡單，直頭係有水準，值得推介！
餐廳室內環境舒適，整體好古早味feel，武漢肺炎下做足抗疫功夫，雖然小店無特別標明自己係黃色店，但從好多細微地方都睇得出小店係屬於黃色系，淨係睇電視只係播杜汶澤嘅《喱騷》飲食節目都略知一二。
而且歡迎每位客人隨便攞店舖自製嘅消毒噴劑，只有黃色類別先會有呢啲無利益輸送嘅慷慨，藍色店舖會有咁慷慨？
逢甲鹹酥雞肉燥飯
肉燥份量剛剛好，撈飯唔會太多太少，味道香口，唔會太鹹。至於雞肉亦外脆內軟，香酥味十足，炸粉真心唔厚，小編平時好怕食厚粉炸雞，只食到炸粉就不了，呢個的確有台灣逢甲水準。
五寶雜錦醬乾拌麵
碗內拌有麻辣醬同芝麻醬，包含台式香腸、滷水雞翼、滷水豆腐、貢丸、花枝丸，我哋自己加咗蝦仁卷，食之前要撈勻醬汁同麵條，而撈嗰吓其實幾巧技巧，要令啲醬汁平均黐落每條麵條上。麵條都掛汁，算爽口彈牙，撈埋醬汁好似仲好食過台灣買返嚟啲kiki麵！
台灣滷水拼盤
木盤器皿上有豆腐、滷蛋、牛肉、萬巒豬腳、雞翼，滷水好入味，但味道偏鹹，不過配上清甜豆漿類飲品就好適合，覺得滷蛋同滷豆腐比肉類出色。
豆漿紅茶+豆漿綠茶
將兩款茶類分別加入豆漿幾新鮮，好有台式食物嘅創意feel，飲落既布豆漿味，亦有紅茶同綠茶味。紅茶味比較深沉，味道要喺口腔耐少少先出到；而綠茶味就比較出位，一入口已經飲到好甘香嘅綠茶味。兩款邊款好飲啲純睇個人喜好。
哈豆
地址﹕觀塘成業街19號成業工業大廈2樓29室
營業時間﹕11:30 – 21:00
3904 2477
延伸閱讀﹕【黃店巡禮】觀塘工廈精選 5.1.黃金周必食3間抗疫小店
延伸閱讀﹕觀塘東廣場3間素食店 到底邊間最抵食？
在〈抗疫小店隱藏觀塘工廈 炮製超正宗台灣菜〉中有 6 則留言
留言功能已關閉。