近天澤商場!天水圍後山矮過嘉頓山 秘道闖淋坑山賞北方黃昏景【野餐隨行】

近天澤商場!天水圍後山矮過嘉頓山 秘道闖淋坑山賞北方黃昏景【野餐隨行】

近年,香港景點已經被本地人挖盡,秘境已經唔再係秘境,每一處地方都被玩盡,實在難以找尋較少人熟悉嘅拍拖兩個人好去處。編輯反其道而行,從市區後山著手,天水圍就有一座後山,尚且未算被人群淹沒,皆因山上多為附近居民,多用於晨運,而後山比深水埗嘉頓山更矮,15分鐘就可以登頂,看似簡單,而山上又有眾多分岔路口,四通八達,可以眺望北方黃昏日落景色,亦能環瞰360度風景。

天水圍後山入口位處喺邊度?基本上,兩個通道都可以通往後山入口處,分別靠近天澤邨,而天澤商場則位處天澤邨,落成有22年,靠近天恆邨巴士總站,商場雖則樓高三層,連同街市有多間食店,但實際上商場內僅有一千零一間良心小店,非常罕有。

一間以粉麵店為名嘅小店,原來係賣港式小食為主,包括有魚蛋、燒賣、腸粉、牛丸、山竹牛肉、碗仔翅、撈麵,比較特別嘅係蟲草花雞肉燒賣、麻辣木耳豬肉燒賣,$10有7粒,有機會可以兩溝,價錢上同一般小食店無異,燒賣餡料就夠新奇,不單於豬肉燒賣餡料內添加麻辣醬料,另有雞肉餡料嘅燒賣,更添加矜貴蟲草花,香味特別。

而港式懷舊粉仔$15 狀似狗仔粉,配料有豬油渣、蝦米、冬菇絲,濃稠度高,配料適中,蝦米味比較重,狗仔粉就有咬口。編輯係落山之後先買嘢食,所以無上山食,故建議大家可以從天澤商場步行上淋坑山野餐。

由天澤商場右邊小路起步,位置為天澤邨與天恆邨之間,向北方走就會見到小天橋,橫過一道排水道。橫過天橋之後,可見橋底為天瑞徑單車路,橋嘅盡頭可以走出天影路。眼見唔少居民會走出小缺口,胡亂橫過天影路到對面方向,編輯建議大家從天橋轉左,依循天瑞徑一直步行至天秀路,位置為天澤邨左邊,近天水圍香島中學,皆因只有前面天秀路、天影路交界先有行人過路燈。

橫過天影路後,轉右直行,經過觀音廟入口,步行大概3分鐘,就可以折返天澤邨對面,可見一個小缺口,而呢個小缺口就係天水圍後山入口處,不時有居民步入,係天水圍區內嘅後花園。向天仰望,只見一座海拔唔係好高嘅小山丘座落於一埋天水圍屋邨背後,而呢座小山丘到底叫咩名?

事實上,天水圍後山名叫淋坑山,係一座海拔高約70米嘅小山丘,最高點比深水埗嘉頓山更矮小,淋坑山通常會因利乘便被直接稱作天水圍山,小山丘位處天水圍與流浮山之間地段,

從小缺口步行入內,會先發現左邊有一個大草原,青草有半個人身高,看似一望無際,原野空曠,恍惚係一個綜藝節目拍攝好地方。穿過草原之後,就可以上行小山路,路段為粗糙石砌山徑,但亦算簡單易行,即使中途見到分岔路亦無需要理會,只需一直上行就會到達山頂位置。

不消30分鐘,即可從天澤商場步行上淋坑山山頂其中一個標高柱位置,海拔只有不足60米高,該標高柱非常迷你,夠晒的骰,位置有樹蔭遮蔽陽光,山頂有少量附近居民自製設施。而繼續向右邊方向走,則可到達另一支比較正常嘅標高柱,海拔則高約70米,兩者之間大概只係100米距離。

淋坑山山頂景觀遼闊,能夠輕易賞360度風景,係一個天水圍居民嘅後山瞭望台,東面可見尖鼻咀至輞井村、米埔,南面能回望天水圍市區,西面更可環瞰流浮山、蠔排、雞伯嶺、深圳灣公路大橋,甚至係遠眺靈渡山、杯渡山、深圳蛇口,至於北面則可遠眺深圳后海灣、深圳灣公園一帶,亦可俯視山腳雲浮仙觀、農莊地帶。黃昏時份,淋坑山既有無敵海景,同時亦可享絕美鹹蛋黃日落景。

步行登上淋坑山後,就會發現山頂背後仍有小路,路段只係短草脊路,依山路前行可繼續向北面走去,可通往對面嘅觀音山。事實上,淋坑山、觀音山距離極為接近,只係兩座面對面嘅山頭,山路可以貫通。山坡路線基本上亦算平坦緩和,但都有500至600米,需要曝曬,山路遍佈浮沙碎石,容易跣腳,絕對不能夠掉以輕心。

淋坑山位於新界西,地理上係香港西北面,並非正式行山徑,而東南西北都有出入口,除咗南面入口位處天影路,東面入口為天月路,西面入口近巒山壹號,而北面入口就係深灣路。的而且確,向山頂平台右邊或左邊走,亦可以環繞淋坑山走個一圈,從唔同角度賞山頂景,只不過盡頭多為墓地,大家最好都係適可宜止啦!

E.A.Tips :

❶ 巴士路線 265B,265M,276A 可到達天恆邨巴士總站。

❷ 小店位於天澤商場街市內,近天恆邨巴士總站入口。

❸ 可以從天澤邨左右兩邊天橋前往天影路,但只有天澤邨與天富邨之間路段先可以於紅綠燈橫過馬路,天澤邨至天恆邨之間過橋後係無紅綠燈,所以要依下面隧道過返天澤邨左邊先可以於天影路橫過馬路。

❹ 天澤邨排水道對面就係天水圍山,即淋坑山。

❺ 行返去天澤邨對面,就有小路口可以進入大平地。

❻ 淋坑山分岔路眾多,四通八達,原路折返就OK。

❼ 山路多沙石,最好都係穿著有防滑功能嘅鞋。

❽ 基本上30分鐘可以到山頂。

❾ 走過山邊要特別小心,因為屬懸崖邊,並無圍欄。

❿ 上山路段即使有分岔路口,亦只係通往同一個地方。

⓫ 野餐時,自己垃圾謹記自己帶走!

⓬ 野餐要盡量使用可循環再用之餐具器皿。

⓭ 可以挑選有長櫈嘅地方,會較方便。

⓮ 有需要可自備小餐枱、小型露營櫈用餐,可以隨時去到邊食到邊。

⓯ 野餐時正對海景用餐會比較Chill。

⓰ 最好挑選較少人嘅地方,避免接觸人群。

⓱ 野餐地同食肆最好距離不足15分鐘步程,以免食物及熱飲冷卻,有需要就自備保溫袋。

EATWO
Miss A

天水圍萬有粉麵

天水圍天澤邨商場地下天澤街市TC7號鋪萬有粉麵
07:00 – 19:30

淋坑山

流浮山