新田購物城淪死城？瞬間竟變單車場

[sig_post_pv label=”瀏覽：”]

新田購物城位處新田，係一個落馬洲邊境購物城，離新田公共運輸交匯處只係3mins腳程，原先係為咗迎合大陸人需要而興建一座購物城俾大陸人購物，但武漢肺炎後，遊客大幅減少，出街人數日減，有youtuber曾直擊整個購物城頓時淪為死城，隔咗一段時間，記者再次親自到新田購物城直擊觀察一下。

據了解，新田購物城以倫敦BOXPARK Shoreditch同紐西蘭貨櫃屋建築為藍本，將每個店面設計成一個個貨櫃，經合大型購物中心，不過感覺仍然好大陸Feel，似足一秒去咗大陸。原本分6個區域，有齊服飾、餐廳、名店、美妝護理、家居用品等，分紅黃藍綠四色設計，合共有近百二間店舖。

今次小編親自到新田購物城一趟，甫落車即感覺到一片寂靜氣氛，揸車去只能將車泊喺外面。從入口觀察，購物城內的確係感覺到一片死寂，人流甚少，仍然營業嘅店舖唔多，一個區域大概只有三兩間店舖如常營業。

事實上，購物城內最大特色應該係提供咗一個安全又可以踩單車嘅室內空間，市區應該難以搵到咁大個空間無咩人流之餘，又可以自由踩單車。

依當日所見，購物城內都係講廣東話嘅香港人，基本上已經無晒大陸人。用「死城」嚟形容新田購物城好似又唔算最貼切，因為餐廳嗰邊都算幾熱鬧，估計係附近居民過隔離搵食，似係回歸香港人多啲。雖然被稱為「死城」，最意外係當日仲見到有餐廳新開張，係一間炭火燒烤，據悉呢種燒烤方式一定要喺戶外地方開業，所以見到有炭火燒烤爐喺戶口座位。而對面亦有一間幾抵食嘅蒸氣海鮮火鍋，價錢合理，食材新鮮。