觀塘後花園沈雲山

輕鬆上山抖抖氣 「觀塘後花園」沈雲山必影神秘打卡位

[sig_post_pv label=””] 個人瀏覽過



武漢肺炎令唔少人逼晒上山抖氣,早前本來人流稀少嘅赤柱都人頭湧湧,事實上人群湧去同一個地方其實更危險,所以記者再次建議大家要遠離人群,要行山不妨反其道而行,去市區嘅山先係真正抖氣嘅地方,大家唔好睇少市區山,其實景觀同打卡位一樣都有㗎!

沈雲山又稱水塘山,位處觀塘,鄰近佐敦谷公園,高約177米,從Google Map未必直接可以搵到,只係觀塘區一個小山丘,有觀塘人稱之為後花園。

上到沈雲山山頂,景觀較何文田紅燈山開揚,東北面有順天邨、大上托、聯合醫院,北面有順利邨、飛鵝山,南面有樂華邨、鱷魚山、牛頭角,西面有佐敦谷,更可望到獅子山側面,東南面基本上係觀塘,而西南面就係九龍灣。

沈雲山有水務署嘅觀塘上配水庫遊樂場,沿路會見到小樓梯shortcut上去,不過其實行前少少就係正門,遊樂場有一個超大草地,最適合小朋友放電、拍拖情侶散步,仲有緩跑徑、涼亭同遊樂場健身設備,係俾街坊跑步、晨運同休息嘅好地方。

黃昏時間,遊樂場西面仲可以見到夕陽,金黃色光線照射的確令人振奮,由於四周無樓高過沈雲山,所以相信平時東面都可以睇到日出。

出咗遊樂場,向九龍灣方向繼續行,可以清楚見到獅子山側面同佐敦谷公園大草地。再行到盡頭位置,會見到有一個藍白色小屋,轉向右邊會見到有一個神秘嘅打卡位,原本係一個防空洞,拍攝感覺好有頹廢風,略帶陰森嘅感覺,適合想打卡同影特別風格相片嘅朋友!

喺盡頭有一條小路可以落山去九龍灣方向,山路較順利嗰邊車路窄,全為泥路,比較崎嶇不平,最好要有心理準備。

不過,好彩啲山路全部被人行過,路線都尚算明顯,落山時比較斜嘅山路兩旁仲有繩索作支撐,向右行就無錯,所以沿路落山都唔算太難,但仍需小心,行到近底會有石屎路就會比較輕鬆,左邊方向最後會見到水塘水壩,可以直接去到佐敦谷遊樂場,最後行去出口就會見到九龍灣彩霞道,搭車離開相當方便。

E.A.Tips﹕
(1)由Google Map去Search,未必Search到沈雲山,一般會Search到沈雲山抽水站,如果搵入口,建議直接Search振華道晨運徑或觀塘上配水庫遊樂場,順利邨道方向車路上山會見到入口有指示牌,寫住觀塘高地食水配水庫。
(2)若由車路上山,唔想走回頭路,可以從九龍灣方向走,不過順利嗰邊車路易行,而九龍灣方向嘅小路雖然極快速上山,但同山路無咩分別,比較難行,有一定危險性建議日光時間先行走。

交通﹕搭巴士例如290A到達順利體育館附近,沿順利邨道而行約5至10分鐘,去到順天邨過對面馬路,會見到車路入口上山,大概行15至20分鐘,又或由振華道晨運徑上山頂。

延伸閱讀﹕大片草地 野餐之選 最啱小朋友放電

延伸閱讀﹕CoCo Espresso登陸九龍灣 罕見氮氣咖啡綿密有餘韻

沈雲山抽水站

地址﹕佐敦谷振華道50號

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!