隱世良心小店惹味串燒最啱佐酒

2020-02-12 2022-05-25 / 串燒、宵夜、居酒屋黃店、抵食、日本料理、燒夜食堂、長沙灣美食、長沙灣黃店、隱世 / 作者: 撰文﹕Miss A ；攝影﹕Mr E, Miss A；設計﹕Mr E

小編放工後兩個人一齊去長沙灣買嘢，之後搵嘢食search到呢間小店，睇落唔係好明顯嘅黃色小店，似係比較隱藏feel。memo紙同poster都無貼店外，反而貼晒店內門口都係得好輕微嘅細貼紙，而家拍拖搵食當然要識揀啦。

呢排疫症嚴重，店方仲每人俾咗個信封我哋放口罩，幾細心！店內只有兩個人做嘢，後來多咗客人仲得返一個人，一坐低就請我哋喺APP點餐，點咗少少小食同串燒。

蟹籽沙律
呢個前菜幾清爽開胃，店方好唔吝嗇咁成pat蟹籽放落去，入面仲有蟹柳同青瓜絲，下面超多青瓜絲，青瓜迷必食！

白湯叉燒拉麵
拉麵不過不失，價錢就好平，質素雖然唔稱得上專業，但就一定比味千嗰啲好。湯底未算好濃稠，叉燒都OK，溏心蛋就煮得唔錯，剛剛好，有溏心狀。

炸雞軟骨
炸粉唔厚，細細粒好易食，一碟份量都唔少，軟骨輕脆，炸得幾香。

串燒➡生燒車厘茄x2、汁燒京蔥黑毛豬串、鹽燒雞皮串、鹽燒雞腎串、鹽燒雞軟骨串、雞肉棒
每串十零蚊算可接受，而家嚟講係正常價錢，大多用鹽燒方式整，表面灑有調味粉，鹽燒嗰啲有少少偏辣，串燒一般味道較重，比較適合配搭啤酒，雖然小編唔飲得啤酒。車厘茄值得一試，食完比較重味嘅串燒再食一串車厘茄好舒服，酸酸甜甜，可解去其他串燒嘅鹹味。