講到屯門嘅標誌，絕對非「屯門巴倫紐」莫屬，離標誌地點不遠處，有一個Food Court，匯集各路美食，當中有3間小店係值得拍拖兩個人一試，你又知唔知係邊度呢？
「屯門巴倫紐」其實即係「屯門巴黎倫敦紐約米蘭電影院」，係區內一個眾人皆知嘅地方，係一間目前超過30年歷史嘅戲院。而離戲院不遠處，可見另一個有咁上下歷史嘅雅都商場（ACME Shopping Arcade），現時恍如一個舊式而無乜人行嘅商場。
原來雅都商場樓上有一個2019年開業嘅Food Court，名為「Gogo Mall」。美食廣場位於雅都商場內，「Gogo Mall」其實只係一個Food Court嘅名，只要步行上1樓，就可以到達美食廣場。場內有逾萬呎，目前有十幾廿間食店，但當中同路嘅只有3間。
（1）雞同鴨講臺灣篇
甫踏入美食廣場，3間小店中最先映入眼簾嘅係一間主打雞飯嘅小店，以「雞同鴨講」命名，由元朗開到屯門Food Court。本身元朗店都係以泰式海南雞飯為主，而屯門分店分別在於在插台灣美食選擇。
玻璃窗透出幾隻雞，表皮望落油亮，必食之選自然係無骨海南雞飯$45、無骨醬油雞飯$48、無骨鹽水雞飯$48，每半隻海南雞賣$75，餐牌中亦有南亞咖哩系列，當然少不免台式肉燥飯，感覺有如台式Mix泰式，至於飲品選擇唔多，只有加$3紙包飲品、加$5罐裝汽水。
以無骨醬油雞飯為例，似乎係以泰式海南雞飯為基底，配合台灣嘅醬油濃味，更有4款醬汁可擇，編輯並無加$10轉雞髀肉，故全碗都係雞胸肉。
不過，難得嘅係雞胸肉唔嚡口，無骨兼啖啖肉，而且肉質軟腍，皮下脂肪少，雞皮則因浸過醬油而被染成醬油啡色。百搭醬即係酸甜醬，相對另外3款比較少見，雞皮本身嘅醬油味道不濃，有啲清淡，蘸上酸甜醬後，先令味道提升。
雞同鴨講-臺灣篇
屯門屯門鄉事會路112-140號雅都商場Go Go Mall1樓S61號舖
11:00 – 21:00
5438 6345
（2）章魚燒大師
第二間係離第一間有兩個舖位距離嘅章魚燒大師，本身係一間特許經營店，但牛頭角分店已經結業，而屯門虹橋分店則已搬到Gogo Mall內。
章魚燒本身係早於90年代殺入香港，成為受歡迎嘅日式小食，而Food Court內嘅章魚燒大師就以章魚燒卜主打，包括章魚燒便當$39，原味太郎4粒配自家製洋蔥汁、味噌湯，店內另有原味、芝士味、綠茶味、朱古力味嘅雞蛋仔可擇。
所以，章魚燒就係主角，每份即叫即製，熱焫焫上枱，比如飛魚子三郎8粒賣$48，大滿足$69有12粒，小店嘅章魚燒更包含原味、飛魚子、明太子、wasabi 4款口味，整體口味似關西嘅章魚燒。
當章魚燒遇上飛魚子，口感上更有層次，章魚燒表皮燒得金黃，但非脆身，而係軟身，內餡包含章魚粒同粉漿，軟熟中有咬口，入口滾燙，章魚粒彈牙，醬汁香甜，頂端再舖滿蟹籽、木魚絲、紫菜碎、沙律醬，加添爽脆感，鹹香中有微甜。
章魚燒大師
屯門屯門鄉事會路112-140號Go Go Mall1樓S67號舖
12:00 – 22:00
9191 7400
（3）阿土伯鹽水雞
而第三間就係位於第一間同第二間嘅中間，亦係最為人熟悉嘅一間，因為全港有好多間分店，都算係連鎖式食店。阿土伯鹽水雞顧名思議就係以台灣夜市鹽水雞為主打，可以食返台式風味，另有肉燥飯餐$65、台灣麵餐$55等可擇。
當中，麻辣雞翼尖$20 都係繼鹽水雞另一種必食佐酒小食，鹹香味濃，店內嘅雞翼尖比B仔雞翼尖嘅辣味更重，辛辣中有重麻味，食落令人味蕾覺醒。
阿土伯鹽水雞
屯門屯門鄉事會路112-140號雅都商場1樓S65號舖
9856 3616
E.A.Tips :
❷ Go Go Mall 位置近屯門巴黎倫敦紐約戲院同凱都戲院。
