【野餐隨行】無紅肉非素食店!中環羽衣甘藍沙律餐單健康又飽肚 大力推介黃泥涌水塘星級湖邊餐廳

【野餐隨行】無紅肉非素食店!中環羽衣甘藍沙律餐單健康又飽肚 大力推介黃泥涌水塘星級湖邊餐廳

近年,香港素食者上升,本地人對素食要求也增加,令素食餐廳愈開愈多,要拍拖兩個人挑選良心素食其實不難,中環巷弄間就有一間貌似賣素食嘅小店,但其實只係唔賣紅肉,賣清新飯盒,不時有外藉人士出入購買沙律飯盒,似乎不單止受本地人歡迎,而且吸引唔少外國人支持。今次編輯帶住呢款沙律飯盒,介紹讀者一個星級外賣飯堂,面對水塘及湖邊,毋須曝曬,更有超靚枱櫈提供,環境一流,簡直係一個純天然嘅餐廳!

中環利源西街小巷內,隱藏一間小店,就算望落似素食,但店舖其實無標明係素食店,只不過餐單上菜式選擇比較清新簡單,類似素食,實際上只係以新鮮沙律為主,餐牌上係可以見到有肉地存在。餐牌中英對照,價錢雖然稍貴,但食物有高水準,地理上都十分方便,平日受到唔少中環OL歡迎,假日更吸引唔少外藉客人,似乎係大隱隱於市嘅餐廳,連外賣盒都係再造紙製造,絕對係以外賣人士為主嘅餐廳。

素食唔止係為咗健康,亦可以係一種Lifestyle,等同編輯嘅外賣食堂一樣,只係選擇自己嘅Lifestyle。小店以「Kale」命名,望落似乎係素食店,皆因「Kale」等同「羽衣甘藍」,而店內嘅主食的確以羽衣甘藍為主,價錢唔算太平,但每一款都絕對能夠飽肚,據悉小店大概從2018年起由年輕女生開設,店內重有註冊營養師幫忙。羽衣甘藍向來狀似Superfood,本身係一種蔬菜,或者用作植物裝飾,品種唔同,可供食用或觀賞,歷史可追塑至古希臘時期,現時德國、英國、荷蘭、美國會較多出產羽衣甘藍。

由中環市中心乘搭一程巴士路線,10分鐘就可以直抵黃泥涌水塘公園站,步行5至10分鐘即可到達水塘。而黃泥涌水塘一隔有一個小公園,毗連水塘,湖邊內有唔少人划艇,水塘湖水清澈,唔少人都趁機於湖水中泛舟。而編輯唔帶大家遊湖,反而想大力推介一個外賣專用食堂,如果要評分,呢個秘密地方絕對有資格登上星級飯堂之名!

黃泥涌水塘建於1899年,相對香港其他水塘細小,而且靠迎路邊,但就係係港島第3座興建嘅水塘,於1986年先被市政局改建成黃泥涌水塘花園,設有划艇服務,可以玩水塘公園水上單車,水塘嘅水壩以花崗石建成,同水掣房、溢流口早於2009年並列為香港法定古蹟。

水塘公園底層雖然有枱櫈,但就係小食亭同泛舟專用,其實只要上行一隅樓梯,就會發現上層另有兩個限定公眾座位,枱櫈為竹藤製,方便又舒適,絕對係野餐好地方。位置可俯視下方湖畔,一端更可望水塘風景,環境清幽。

素食餐單內有4款迷你漢堡、各式素食小食、藜麥燴飯Risottos,而有機全麥捲餅有7款,每款$100。當中,Tuna Madness 2.0 包含炙燒吞拿魚Seared Tuna、黃薑椰菜花Turmeric Caulirice、牛油果Avocado、香辣蕃茄醬Spicy Tomato Sauce、羽衣甘藍Kale,以編輯真實計算,一條捲餅足足有一條下手臂嘅長度,大概23cm,或者鞋嘅37吋長,份量十足。實際上,編輯認為有幾分似土耳其嘅烤肉捲餅,即kebap。

捲餅餡料豐富,相當厚身,全麥餅皮厚薄適中,最頂同最底會食食吓漏汁。而餅皮並非唯一包裹物,羽衣甘藍先係包裹餡料嘅第一層,而羽衣甘藍似乎早有醋汁調味,菜質幼嫩而爽脆,容易嘴嚼,唔會有未煮熟嗰種臭青味同苦澀味,入口令人開胃。吞拿魚肉混於捲餅內,鮮味十足,牛油果置於捲餅正中間,有存在感而唔會太搶戲。捲餅內包滿黃薑椰菜花飯,粒粒飯粒夠乾爽,只有啖啖黃薑味,比較清淡,同吞拿魚餡料出奇地配合值得一提係香辣蕃茄醬,入口有微辣味,第一啖好奇怪,但逐漸又覺得口味唔會太辛辣,反而係為捲餅提升味道,都算係捲餅嘅靈魂。

至於沙律飯盒每份$110,包括有7款主菜、3款配菜、5款沙律,都為純素選擇,例如香草雞肉Kale Pesto Chicken,可以配搭甘藍糙米飯Kale Brown Rice with 1 Salad配一款沙律,沙律可選烤雜菜Roasted Vegetables,包括有南瓜Pumpkin、秋葵Okra、茄子Eggplant、車厘茄Cherry Tomato。平常坊間嘅沙律菜都係冰冷為主,但小店嘅沙律菜並非坊間嗰種冷冰冰嘅沙律菜,反而係室溫處理,即使女士們唔方便食凍嘢都可以大快朵頤。

沙律飯餅組合內,甘藍糙米飯係公平貿易有機糙米,放於主菜底下,飯粒與羽衣甘藍碎拌勻,有煙韌口感,頂端加上獨特香草醬,同樣混有羽衣甘藍,口味清新。而主食香草雞肉亦唔簡單,似乎係以慢煮方式炮製雞肉,略有香甜,並無多餘脂肪,入口調味極輕,只係略略有味道,雞肉軟嫩,味道簡潔,白肉的確比紅肉更有營養。至於飯盒另一隅則有烤雜菜,5款蔬菜放埋一齊,有如大雜燴,南瓜煮得腍身,軟糯而綿密,帶有南瓜香甜味,甜度似蕃薯;茄子亦有調味,而其他2種則無乜特別,但就感覺清新健康。

E.A.Tips :

❶ Stamp Card可儲印仔,每$100有1一個,儲滿10個可以當$50使用,每20個印仔可以免費獲一份素食飯盒。

❷ 黃泥涌水塘公園划船開放時間為逢星期六、日及公眾假期09:00-17:00,價錢以兩個人計算為$120/45分鐘、$180/2小時。

❸ 店內可以自助形式取水或餐具。

❹ 店員為外國人,似少數族裔,故需要用英文點餐,怕講英文嘅自己用手指逐個item篤。

❺ 水塘公園有小食亭,洗手間。

EATWO
Miss A

Kale

中環利源西街26號地舖
星期一至五10:00 – 21:00;星期六至日10:00 – 17:00
10:00 – 17:00 2511 1777

黃泥涌水塘公園

大潭
09:00–18:00
10:00 – 17:00 2555 0103