清心齋荔枝角插旗！綿密芋頭魚一食就飽甜品$26/4件清新糕點

如果想食素或齋，以連鎖店計，清心齋應該係入圍之選，想清清哋可以拍拖兩個人選擇食齋，只不過本身有好幾間分店，現時只係淨返3間分店，2間舊店位於將軍澳，而新店則位處荔枝角，想飽肚嘅可以選擇素版糯米雞、綿密嘅芋頭魚。

食齋就當然要食齋滷味$30，可以自由選擇蒸、微波或即食，聲稱健康，而且反式脂肪、糖、鈉含量都偏低。齋滷味包含齋叉燒、甜酸齋、蠔油齋、咖哩齋，每樣至少有4至5件，味道濃淡適中，件件夠入味，齋叉燒有咬口，蠔油齋、咖哩齋唔會太鹹或太辣，但始終最出色都係甜酸齋，開胃又美味。

飽肚之選係糯米雞$22，可蒸或微波，但要蒸夠20分鐘，唔可以即食。糯米雞係素版，無肉感，內餡只有菇菌類，但都做到葷食感覺。

而另一款飽肚之選係芋頭魚$28，可氣炸、焗爐或煎炸，但就唔可以微波或即食。芋頭魚係將芋頭造成魚嘅形狀，經過烤焗之後，外脆內軟，染成微啡，表皮微脆，內裏芋頭蓉軟腍綿密。

▲ 芋頭魚$28。

▲ 糯米雞$22。

甜品包括琥珀馬蹄糕、芝麻糕、馬豆糕、紫芋糕、彩虹椰汁糕、紅豆糕、蘆薈椰汁糕、杞子桂花糕、芒果西米糕，無清香棗皇糕，$26有4件糕，單買$8/件，另有自家石磨豆漿$12/支。先挑選其中4款，馬蹄糕、芝麻糕、彩虹椰汁糕、紅豆糕，4款當中比較出色嘅係馬蹄糕、芝麻糕，紅豆糕不過不失，而彩虹椰汁糕七彩繽紛，只係賣相較特別，其實只不過係椰汁糕內有幾粒啫喱，而且整件糕會快速融化。

最挺身嘅應該係芝麻糕，亦有彈性，其次係馬蹄糕、紅豆糕，只係芝麻糕嘅芝麻味適中，但略嫌唔夠香濃，而馬蹄糕比較晶瑩、清甜，紅豆糕則較淡味，但粒粒紅豆又軟糯香甜，馬蹄粒同紅豆粒都分配平均。

E.A.Tips﹕

❶ 接受現金、八達通作付款方式。

❷ 清心齋現時分店地址只有將軍澳常寧路2號TKO Gateway地下Food Lane EF11號舖、將軍澳欣景路8號新都城中心二期1樓1021號舖、荔枝角荔枝角道833號昇悅居昇悅商場1樓125號舖，至於沙田德厚街3號禾輋街市地下M26號舖、深水埗富昌邨南昌薈街市地下105號舖、樂富聯合道198號樂富廣場樂富街市地下405號舖、美孚吉利徑1-21號美孚新邨二期地下50B-10號舖、筲箕灣筲箕灣東大街42-52號金來大廈地下L號舖、屯門湖翠路1號蝴蝶廣場街市地下M215號舖、油塘鯉魚門路80號鯉魚門廣場地下112號舖、大圍車公廟路69號顯徑街市地下M28號舖已經結業。

❸ 注意部份可以即食，部份唔可以，唔知就買時問定職員。