毗連協和里舊街牌！跑馬地鬧市戰前神秘防空洞地下隧道全長竟有近千米？

跑馬地係一個將舊有產物保存良好嘅香港島小區，係一個值得拍拖兩個人探索嘅區域，單單一道街道內，仍舊擁有戰前舊樓、T形街牌，更難以置信嘅係，竟然隱藏一個戰前防空洞！

T形街牌多數置於戰前舊樓牆壁上，係英國殖民時期嘅文化產物，只係至今舊式街牌少之又少，唯獨港島區仍有唔少屹立不搖，跑馬地就係其一。區內好早就被開發，另有「快活谷」之名，來自英文「Happy Valley」。當中，跑馬地綿發街則同時可以見到2個T形街牌，與協和里只係幾步之遙，係僅存嘅舊街牌。

「綿發街」英文為「MIN FAT STREET」，T形街牌以上英下中方式呈現，位置係綿發街16號，大廈為一幢複合大樓，名為怡發大廈，舊街牌之下為一間女性飾物店。望向左邊，會見到另一個T形街牌，寫有「協和里」，英文為「HIP WO LANE」，被放於巷弄牆角位置，舊街牌同樣為上英下中方式呈現，鄰近香港賽馬會馬伕宿舍，整道「協和里」小巷全長僅有約200米。

更特別之處係「協和里」旁邊嘅石牆，表面上平平無奇，就恍如坑渠，但實際上曾經係一個戰前防空洞。建築物毫不顯眼，你大概未必會諗到鬧市中仍然有一個防空洞，而且係躲藏於不時經過嘅地方。而防空洞入口就位於協和里舊街牌旁，坑渠旁邊為一幅石屎牆，背後有大樹，綠意盎然；另一端有樓梯級，可從上而下俯視小山坡。小山坡以下就係防空洞地下隧道，不過防空洞入口已經封閉，禁止進入，一般人只能夠於協和里入口石屎牆嘅小窗口窺視內部情況。

上年中旬，有現任區議員曾經提議於跑馬地協和里防空洞外牆入口繪上壁畫作品，提倡以著名藝術家 Invader 紙皮石作品《香港功夫狗》（Hong Kong Phooey）繪成壁畫，美其名係做外牆美化工程，有意做一個「成功爭取」嘅Project，本身預算為$75000，但結果受到爭議。唔少人都直指應該保留原貌，唔應該於牆上塗鴉或加添任何嘢，先係對歷史建築嘅保護。