鍾意咖啡嘅人一定要試，呢間叫Relax Coffee嘅小店更值得支持！
位置喺工業區附近，可能有少少偏僻，實際上好近商場同地鐵站 。門口幅牆好細心有圖畫標記咖啡唔同類型，可慢慢揀啱自己口味嘅咖啡。室內空間唔多，比較適合兩個人坐低歎咖啡，拍拖得閒可以坐吓都幾疏乎呢。
小編當時同店主傾偈知道佢同旅居台灣嘅Blogger Andy係Friend，2位都係香港人同咖啡師，都係好支持香港。店內咖啡豆都係香港同台灣優質品種，有啲仲係都係特別由台灣帶返嚟，佢哋沖咖啡超用心，正過出面連鎖店嗰啲。
手沖咖啡味道香濃，無太多苦澀味，唔使點再加糖。
Latte好香滑，Mocha好重朱古力味，拉花都幾靚呀！
Latte 鮮奶咖啡 $30 、Mocha 朱古力咖啡 $34
除咗咖啡仲有唔少輕食，eg.鬆餅、牛角包、玉桂卷等等。不過Miss A特別推介呢件豆腐櫻花蛋糕切餅！上面有櫻花做裝飾好精緻，豆腐味勁清新，質感好滑溜，唔會太甜或太膩。
豆腐櫻花蛋糕 $32
Croissant 牛角包／Cinnamon Roll 玉桂卷 $13
Blueberry Muffin 藍莓鬆餅／ Double Chocolate Muffin 朱古力鬆餅 $21
雖然舖仔細細，但都有個小型打卡位， 一邊係綠色花牆，一邊係高枱櫈，可以打卡同兩個人坐低慢慢飲杯咖啡，仲有唔少最新台灣旅遊同飲食資訊，似足去咗台灣。
Relax Coffee
地址﹕葵涌葵昌路72-76號地下G06號鋪活@KCC
營業時間﹕星期一至五 08:00-18:00；星期六、日 12:00-18:00
地鐵葵興站E出口，行少少路，穿過天橋及商場落電梯就到地面
延伸閱讀﹕有心思兼有質素 葵涌隱世文青小店
自動引用通知: 有心思兼有質素 葵涌隱世文青小店 - Cozy Cafe | eatwo 兩個人醫吓肚
自動引用通知: 葵涌中心馬路邊百呎微舖 大大碗咖哩飯最平24蚊！ | eatwo 兩個人醫吓肚
自動引用通知: 【黃店巡禮】葵興5間隱藏小店 Cafe寫意悠閒 必試$24最平咖哩飯 – eatwo 兩個人醫吓肚