新蒲崗老區呢間燒味店賣嘅係燒味同燉湯，位置近工業區，行去Mikiki商場只係幾分鐘步程，老區果然隱藏唔少有水準食肆，燒味店當然主打係燒味飯，選擇多多，有叉燒、 切雞、 油雞、燒肉、燻蹄、燒骨、乳豬等，可以單拼或雙拼，燒味飯單拼46蚊，雙拼就48蚊，兩個人拍拖食最平可以100蚊埋單，相當抵食。
燒味飯幾有水準，其中一碟係叉燒燒肉飯，份量充足，白飯加入甜豉油，濃淡適宜，本來想食乳豬，但已經售罄。燒味肉質軟嫩，唔會太硬，而且醬汁充足，亦唔會太乾身。叉燒屬半肥瘦狀，肉質軟腍，一舊吊住另一舊肉，肥瘦適中，幾厚肉。原來啲叉燒係小店自己燒，難怪入口特別香口同有水準。而燒肉係燒腩仔嚟，皮脆肉嫩，只係帶上些微肥膏，唔會好肥膩，入口基本啖啖肉，有少少鹹味，味道好可口。
另一樣主打就係燉湯，試一試海底椰南北杏螺頭燉赤肉配燒鵝飯，仲有油菜同絲苗白飯，都係75蚊，湯底材料有海底椰、南北杏、螺頭、赤肉，可清熱潤肺，止咳化痰，男女老幼都啱飲。燒鵝同樣啖啖肉，表皮輕脆，好香口，皮下脂肪唔多，肉質亦軟嫩，蘸吓酸甜醬更滋味。
燉湯好足料，一羹勺到底有好多舊海底椰、豬肉、南北杏，仲有少量螺頭，以海底椰數量最多，海底椰入口好爽甜，湯底好清甜，無味精，唔會口渴。
E.A.Tips﹕
（1）唔建議燒肉叫外賣，淋晒就唔好食。
（2）燒味本身偏鹹，燉湯比較清，兩者配搭比較好，食完鹹嘢再飲燉湯幾解渴。
交通﹕鑽石山大磡村行過去約15分鐘，Mikki商場行過去約5mins，大量巴士可達，於景泰街、譽．港灣、寧遠街、天主教伍華中學或王仲銘中學落車嘅巴士路線都得。
延伸閱讀﹕新蒲崗時光倒流價定食 香蔥豚肉卷肉汁豐腴大驚喜 仲有Yell Card抽！
延伸閱讀﹕新蒲崗小店3餸車仔麵 陳皮魚蛋夠彈牙 $38下午茶送餐飲
友利坊
| 地址﹕ | 新蒲崗康強街21-23號地舖 |
| 營業時間﹕ | 11:00 – 22:00 |
| 電話﹕ | 2338 6830 |
在〈新蒲崗老區隱藏$46燒味飯 9款滋味健康燉湯任揀〉中有 7 則留言
留言功能已關閉。