[sig_post_pv label=””] 個人瀏覽過
沙灣徑海旁
南港島沙灣徑擁無敵大海景，黃昏時可以從散步徑石壆觀賞絕美日落，仲可以搵埋沙灣泳棚同夢幻韆鞦秘景打卡添！
沙灣徑路段有一個神秘韆鞦架
沙灣徑位處南港島沙灣，靠近摩星嶺、鋼線灣，連接大口環道、域多利道，中段又毗連數碼港道，位沙灣區內一條呈U形嘅主要道路，設施以香港大學職員宿舍、香港大學何鴻燊體育中心、堅尼地小學、麥理浩復康院等為主，而近海邊就有幾處神秘靚景。行開西環碼頭、西環泳棚嘅話，不妨搭車入沙灣，拍攝意想不到嘅景色啦。
沙灣徑散步徑旁邊為運動場、體育中心 
石壆位睇日落超靚
石壆旁可睇到絕美日落景
散步徑旁邊嘅石壆係影相好地方，唔使攀山涉水，都可以輕易拍攝呃Like靚相，亦係兩個人拍拖散步之處。涼風吹拂，海天一色，配搭日落環境更優美，愜意非常。
由散步徑同石壆繼續向左邊行，會見到一個夢幻韆鞦秘景，一個由居民自製嘅木韆鞦，靠繩索懸掛一棵大樹之下，可以靜靜望向大海同黃昏日落景，俘虜唔少情侶、少女，拍拖打卡異常浪漫，絕對係一個隱世夢幻韆鞦打卡位。
石壆位旁邊隱藏咗一個韆鞦架 
沙灣徑海旁嘅夢幻韆鞦架
從木韆鞦折返散步徑，繼續向散步徑右邊而行，可以去到沙灣泳棚，屬一個小型石灘。灘邊有大大小小嘅石頭，行到盡頭會見到一道小橋，仲有小紅旗，泳棚後會見到簡單搭建嘅棚屋。
沙灣徑石灘吸引唔少人前來觀賞日落 
回程時可以喺沙灣泳棚直接離開，從小路石梯而行，可以去污水廠，經過樹蔭，即可以出返大口環道。
沙灣泳棚可以更接近日落景
| e.a.tips （1）沙灣徑中韆鞦僅以繩索懸掛樹上，樹木承重力有限，未有安全檢測過，所以打卡還打卡，你影到靚相，唔等如人哋都影到靚相，為人為己，記得唔好大力搖晃，否則隨時樹木倒塌，韆鞦亦會跌落嚟。 （2）唔少人都會爬上石壆打卡，但石壆有一定高度，而且海邊無圍欄，有一定危險度，所以要特別小心會跌落海。 （3）石灘由小石頭堆砌而成，路面凹凸不平，行走時要小心。 （4）回程小巴站位處大口環根德公爵夫人兒童醫院，留意小巴路線只到大概19:00，記得留意離開時間，否則非自駕就要乘搭的士先出到堅尼地城。 （5）大口環道前行可直接到達沙灣泳棚，腳程僅1至2分鐘，唔少人都會將車泊喺大口環根德公爵夫人兒童醫院外，但始終唔係正規車位，唔知幾時會被發告票。 |
【Like Facebook 緊貼最新資訊，一個Like一個鼓勵，支持原創文章，向Content Farm說不。】
記者示範喺無需要用力搖晃情況下仍可靠角度同Pose拍攝相片 
交通：由堅尼地城小巴總站乘搭58號小巴，於沙灣徑落車，落車位置靠近麥理浩復康院、沙灣沙灣徑運動場，其他小巴路線58A/59/10號都可以抵達沙灣徑。
可乘搭小巴出入沙灣徑
沙灣徑
地址﹕香港南區薄扶林沙灣徑
延伸閱讀﹕坪洲牛皮廠活化秘密花園 秒變裝置藝術空間
在〈南區沙灣徑絕美海景日落 樹下夢幻韆鞦浪漫打卡〉中有 3 則留言
留言功能已關閉。